Estoniya va Finlyandiya Boltiq dengizini Rossiya harbiy kemalari uchun yopishni rejalashtirmoqda

Estoniya mudofaa vaziri Xanno Pevkur Iltalehti gazetasiga bergan intervyusida ma’lum qilishicha, Finlyandiya NATOga a’zo bo‘lganidan keyin, Estoniya u bilan o‘z qirg‘oq mudofaasini birlashtirishga kelishib olgan.

“Finlyandiya va Estoniya raketaga qarshi mudofaasning integratsiyalashuvi Fin qo‘ltig‘ini Rossiya harbiy kemalari uchun yopish imkonini beradi. Finlyandiya va Shvetsiya NATO qo‘shilishi bilan Boltiq dengizi alyansning ichki dengiziga aylanadi”, — dedi Pevkur. Uning so‘zlariga ko‘ra, Estoniya va Finlyandiya raketalari parvoz masofasi Fin qo‘ltig‘i kengligidan kattaroq.

Vazir qayd etishicha, tomonlar bu haqda 11-avgust kuni, Pevkur Xelsinkida Finlyandiya mudofaa vaziri Antti Kaykkonen bilan uchrashgan vaqtida kelishib olgan.

Finlyandiya qo‘shni Shvetsiya kabi Rossiyaning Ukrainaga hujumidan keyin ko‘p o‘tmay NATOga qo‘shilish uchun ariza bergandi. Ikkala mamlakat ham bu alyansning barcha a’zolari tomonidan ma’qullanganidan keyin NATOga qo‘shila oladi. Tegishli hujjatlar 4-avgust holatiga 30 ta mamlakatdan 23 tasi tomonidan ratifikatsiya qilingan.

Avvalroq Estoniya o‘zi tomonidan berilgan Shengen vizalariga ega Rossiya fuqarolari uchun o‘z hududiga kirishni taqiqlashi xabar berilgan edi.

Estoniya bahordayoq, Ukrainada urush boshlanganidan keyin ko‘p o‘tmay Rossiya fuqarolariga turistik vizalar berishni to‘xtatgandi. Hozir vizalar faqat Estoniya rezidentlari qarindoshlariga yoki gumanitar maqsadlarda beriladi.

Avvalroq Estoniya Tashqi ishlar vazirligi Yevroittifoq darajasida rossiyaliklarga viza berishni to‘liq taqiqlashni muhokama qilishga chaqirgan edi. Rossiyaliklarga Shengen vizalari berilishini taqiqlash haqidagi taklif Yevroittifoqda muhokamaga qo‘yildi. Taklif nafaqat sayyohlarga, balki jurnalistlar, dissidentlar va Yevroittifoq mamlakatlari fuqarolarining qarindoshlariga ham viza berishni taqiqlashni o‘z ichiga oladi. Taklif avgust oxirida Pragada Yevroittifoq mamlakatlari tashqi ishlar vazirlari uchrashuvida muhokama qilinadi.