Hindistondagi mashhur tadbirkor oilalardan birining merosxo‘ri va milliarder Sayrus Mistri avtohalokatda vafot etdi, deb yozadi NDTV.
Hodisa 54 yoshli Sayrus Mistri va uning hamrohlari Mercedes avtomobilida Ahmadoboddan Mumbayga ketayotganida yuz bergan.
Mashinada to‘rt kishi bo‘lgan, ulardan faqat ikki nafari omon qolgan va shifoxonaga yetkazilgan. Qolgan ikki nafari, jumladan Sayrus Mistri voqea joyida halok bo‘lgan. Politsiya hodisa yuzasidan batafsil tekshiruv olib bormoqda.
Hindiston bosh vaziri Narendra Modi Mistri vafoti munosabati bilan hamdardlik bildirib, uni Hindistonning iqtisodiy kuchiga ishongan istiqbolli biznes rahbar edi, deb atadi.
“Uning vafoti savdo va sanoat uchun katta yo‘qotish bo‘ldi”, — deb yozdi bosh vazir Twitter’da.
2012-yildan 2016-yilgacha Mistri Hindistondagi eng yirik kompaniyalardan biri bo‘lgan Tata Group ko‘p millatli konglomerat kompaniyasining raisi bo‘lgan. Bloomberg Billionaires Index ma’lumotlariga ko‘ra, Mistri o‘limi vaqtida qariyb 29 milliard dollarga ega edi, bu uni Hindistondagi eng boy odamlardan biriga aylantirgandi.
Izoh (0)