Kobuldagi portlash oqibatida Rossiya elchixonasining ikki xodimi halok bo‘ldi, deb yozadi “RBK” Rossiya Tashqi ishlar vazirligiga tayanib.
“Kobuldagi Rossiya elchixonasining konsullik bo‘limiga kirish darvozasining bevosita yaqinida noma’lum jangari portlovchi qurilmani harakatga keltirdi. Hujum oqibatida diplomatik missiyaning ikki xodimi halok bo‘ldi, Afg‘oniston fuqarolari orasida ham jabrlanganlar bor”, — deya ma’lum qilishdi idoradagilar.
“RIA Novosti” manbasi esa avvalroq bir diplomat va diplomatik missiya soqchilaridan biri halok bo‘lganini ma’lum qilgandi.
“Izvestiya” manbasiga ko‘ra, elchixonaning ikkinchi kotibi Mixail Shax halok bo‘lgan. Jabrlangan soqchi esa kasalxonada vafot etgan.
Rossiya TIV Afg‘oniston xavfsizlik xizmatlari bilan aloqada bo‘lib turibdi, ular tekshiruv olib bormoqda.
Portlash 5-sentabr kuni avvalroq yuz bergandi. “RIA Novosti” manbasi jami 15—20 kishi halok bo‘lgani va jabrlangani haqida xabar bergandi. Al Jazeera esa Afg‘oniston xavfsizlik xizmatlaridagi manbasiga tayanib, sakkiz kishi halok bo‘lib, 15 kishi yaralanganini ma’lum qildi. Al Arabia o‘n nafar qurbon haqida xabar bermoqda.
Shahar politsiyasi vakili Xalid Zadaran aytib berishicha, xudkush Rossiya elchixonasi yaqinida to‘plangan odamlar orasiga kirib o‘zini portlatmoqchi bo‘lgan. Ammo nishonga borib yetmasidan, u xavfsizlik kuchlari tomonidan o‘ldirilgan, xuddi shu paytda portlash yuz bergan.
Rossiya prezidenti matbuot kotibi Dmitriy Peskov hodisani terakt deb atadi. “Shubhasiz, gap terakt haqida bormoqda. Biz bunday terrorchilik harakatlarini qat’iyan qoralaymiz. Va, albatta, hozir qilish kerak bo‘lgan asosiy narsa — voqea joyidan bizning vakillarimiz, bizning diplomatlarimizga nima bo‘lgani haqida ma’lumot olish”, — dedi u jurnalistlarga.
Izoh (0)