2022-yilning uchinchi choragida dunyoning 101 davlatida ommaviy tartibsizliklar xavfi ortib bormoqda. Bu haqda Britaniyaning Verisk Maplecroft konsalting kompaniyasi hisobotiga tayanib, Bloomberg agentligi xabar berdi.
Ekspertlar xulosasiga ko‘ra, 198 mamlakatdan 101 tasida ommaviy tartibsizliklar xavfining ortishi qayd etilgan, bu hisob-kitoblar boshlangan 2016-yildan beri eng katta choraklik o‘sish. Shu bilan birga, 42 ta davlatda tartibsizliklar yuz berishi xavfi kamaygan.
Bloomberg ma’lumotlariga ko‘ra, energiya narxining oshishi fonida Yevropa Ittifoqi mamlakatlarida tartibsizliklar uchun zamin yaratilmoqda. Rivojlanayotgan mamlakatlarda aholining noroziligi oziq-ovqat narxining oshishi va global oziq-ovqat inqirozidan qo‘rqish bilan bog‘liq. Shuningdek, kelgusi oylarda xavflar kuchayishi ta’kidlangan.
Yevropada kuz va qish fasllari energiya inqirozini yanada kuchaytirib, yashash narxini oshirishi kutilmoqda. Dunyoning ko‘p joylarida qurg‘oqchilik va suv tanqisligi oziq-ovqat narxlarining oshishiga olib kelmoqda, bu esa eng ko‘p zarar ko‘rgan hududlarda mahalliy noroziliklarni keltirib chiqarishi mumkin.
Ijtimoiy tartibsizliklar xavfi yuqori bo‘lgan mamlakatlar ro‘yxatiga, xususan, Germaniya, Kipr, Norvegiya, Polsha va Ukraina kiradi. 2023-yilda tartibsizliklar Germaniya, Niderlandiya, Shveysariyada va boshqa mamlakatlarda ortishi prognoz qilinmoqda.
Izoh (0)