Эстония Мудофаа вазирлиги мамлакатга ҳудудининг бир қисми босиб олинган тақдирда партизанлар урушига тайёрланиш имконини берувчи қонун лойиҳасини тайёрлади, деб ёзади «РБК».
Ҳужжат зарур инфратузилма, хусусан, махфий квартира ва қуролли яширин жойлар ташкил қилиб, агентлик тармоғи ва қуролли қаршилик гуруҳларини тайёрлашни кўзда тутади.
Мудофаа вазирлиги вакили Маргит Гросс журналистларга тушунтиришича, самарали қаршилик кўрсатишга тинч даврда тайёргарлик кўриш керак. Бунинг учун ҳарбийларга уларда ҳали мавжуд бўлмаган қўшимча ваколатлар керак бўлади. Масалан, гап яширин ташкилотга кирадиган одамларни жалб қилиш ҳақида бормоқда. Эстониялик ҳарбийлар ҳисоб-китобларига кўра, ҳамкорликка фуқароларнинг 0,1 фоизини жалб этиш керак ва улар тинч даврдаёқ бир-бири билан таниш бўлиши керак, шунда уруш бошланган тақдирда улар маслакдошлар қидиришига тўғри келмайди.
Мудофаа тадқиқотлари маркази эксперти Иво Юурвеэ ERR’га маълум қилишича, Мудофаа вазирлиги таклифи Болтиқбўйи СССРга қўшиб олинганидан кейин пайдо бўлган «Ўрмон биродарлари»га ўхшаш ҳаракат ташкил этилишини назарда тутади. Бироқ ўшанда партизанлар учун вазият мураккаблашишига уларнинг сафларига совет махсус хизматлари ходимлари кириб олиши сабаб бўлганди.
Ўтган ҳафта Эстонияда НАТОнинг қўшма ҳарбий машғулотлари бўлиб ўтди, унда Буюк Британия, Франция ва Даниядан 800 дан ортиқ ҳарбий хизматчилар қатнашди, танклар, бронетранспортёрлар, танкка қарши ускуналар иштирок этди. Машғулотлар мамлакат шимоли-шарқий қисмидаги Тапа шаҳри яқинидаги полигонда (Россиянинг Ленинград вилояти билан чегарадан тахминан 150 км узоқликда) ўтказилди.
Изоҳ (0)