Yaponiya hukumati sobiq bosh vazir Sindzo Abening davlat dafn marosimiga taxminan 250 million iyen (1,8 million dollar) sarflamoqchi. Bu haqda Yaponiyaning Kyodo agentligiga tayanib, “Kommersant” xabar bermoqda.
Agentlik ma’lumotlariga ko‘ra, davlat dafn marosimini o‘tkazish uchun sarflanadigan xarajatlarning yakuniy miqdori 26-avgust kuni Vazirlar Mahkamasi majlisida tasdiqlanadi.
Mablag‘ binolar va koronavirusdan himoya vositalarini ijaraga olishga sarflanadi.
Yaponiya hukumatining rejalariga ko‘ra, Sindzo Abening davlat dafn marosimida 6,4 ming kishi qatnashadi. Marosimda Fransiya prezidenti Emmanuel Makron, AQSH vitse-prezidenti Kamala Xarris, AQSHning sobiq prezidenti Barak Obama, Hindiston bosh vaziri Narendra Modi va boshqa yuqori martabali amaldorlar ishtirok etadi.
Sindzo Abening davlat dafn marosimi 27-sentabrga belgilangan.
Avvalroq Nikkei gazetasi Yaponiya Rossiya prezidenti Vladimir Putin marosimda ishtirok etishni istasa, unga kirishiga ruxsat bermasligi haqida xabar bergan edi. Chunki sanksiyalar tufayli unga mamlakatga kirish taqiqlangan.
Izoh (0)