Yaponiya politsiyasi boshlig‘i Itaru Nakamura sobiq bosh vazir Sindzo Abening o‘ldirilishi munosabati bilan o‘z lavozimini tark etadi. Bu haqda u matbuot anjumani chog‘ida ma’lum qildi, deb xabar bermoqda Kyodo agentligi.
Brifingda sobiq bosh vazirning xavfsizligini ta’minlash borasidagi qonunbuzarliklar yuzasidan o‘tkazilgan tekshiruv natijalari e’lon qilingan. Tadbir davomida Nakamura qotillik uchun javobgar bo‘lgani sababli o‘z lavozimini tark etishini aytgan.
Avval politsiya boshlig‘i Abening safari davomida xavfsizlik bilan bog‘liq muammolar bo‘lgani, jumladan, bu qo‘riqchilarni joylashtirish bilan bog‘liqligini tan olgandi. Nakamura bunday hodisalar takrorlanishiga yo‘l qo‘ymaslik uchun muammolarni o‘rganishga va’da berdi.
Abening hayotiga qasd qilingan Nara prefekturasi politsiyasi rahbari Tomoaki Onizuka soqchilarga xavfsizlik rejasini tayyorlash uchun atigi bir kun berilganini aytgan edi. Shu bilan birga, tashrif arafasida Abening safari yo‘nalishi o‘zgartirilgan.
Eslatib o‘tamiz, Sindzo Abe 8-iyul kuni o‘ldirilgan. Qotil u Nara shahrida Liberal-demokratik partiyani qo‘llab-quvvatlab nutq so‘zlayotgan paytda uni orqadan nishonga olgan. Shifokorlar so‘zlariga ko‘ra, siyosatchi bo‘ynining o‘ng qismidan, shuningdek, yuragidan yaralangan. Bir necha soatdan keyin u kasalxonada vafot etgan.
Izoh (0)