Britaniya harbiy razvedkasi 21-avgust kuni sun’iy yo‘ldoshdan olingan suratni e’lon qildi, unda Zaporojye atom elektr stansiyasining beshinchi energetika blokidan taxminan 60 metr uzoqlikda joylashgan uchta zirhli transportyor va ikkita harbiy yuk mashinasini ko‘rish mumkin.
“21-avgust kuni olingan sun’iy yo‘ldosh tasvirlari Rossiya Zaporojye AESda og‘ir harbiy ishtirokini saqlab qolayotganini ko‘rsatdi: zirhli transport vositalari 5-reaktordan taxminan 60 metr uzoqlikda joylashgan. Rossiya armiyasi harbiy mashinalarni quvur va ko‘priklar ostiga qo‘yib, bekitishga uringan bo‘lishi mumkin”, — deyiladi Britaniya razvedkasi bayonotida.
Zaporojye AES hududida harbiy texnikalar borligi haqida OAV va Ukraina rasmiylari bir necha bor xabar qilgan. 5-avgust kuni The Insider nashri AESdagi manbalarga tayanib, u yerda zirhli transportyorlar, zenit qurilmalari va radiokimyoviy razvedka uchun uskunalar joylashganini yozgandi. 16-avgust kuni stansiya xodimining Reuters agentligiga aytishicha, AESga ishchilar kirib kelayotgan paytda zirhli transportyorlar stvollarini stansiya kiraverishiga qaratadi.
Rossiya esa Zaporojye AES hududida harbiy texnikalari yo‘qligini da’vo qilmoqda.
18-avgust kuni ijtimoiy tarmoqlarda AESning yadro reaktoriga ulangan mashinasi xonasidan olingani video paydo bo‘ldi. Amerikaning CNN telekanali videoning haqiqiyligini tasdiqladi.
Zaporojye AES — Yevropadagi eng yirik atom elektr stansiyasi, u Ukrainaning Energodar shahrida joylashgan. Mart oyidan beri stansiya, shaharning o‘zi kabi rus qo‘shinlari tomonidan nazorat qilinmoqda. Avgust oyi boshidan buyon stansiya hududi o‘qqa tutilmoqda. Rossiya va Ukraina hujumda bir-birini ayblamoqda.
Izoh (0)