Farg‘onada bir kunda 589 nafar bolaning xatna to‘yi o‘tkazildi

Farg‘onada mustaqillik bayrami munosabati bilan bir kunda 589 nafar bolaga sunnat to‘yi qilib berildi. Bu haqda “Daryo” muxbiri Azizjon Ermatov xabar berdi.

Ta’kidlanishicha, Farg‘ona shahridagi “Fayz” hamda Qo‘qon shahridagi “O‘rda” tantanalar majmuasida bir vaqtda o‘tkazilgan sunnat to‘yi viloyat maktabgacha ta’lim boshqarmasi tashabbusi bilan viloyat hokimligi hamda homiylar ko‘magida tashkil etilgan.

Viloyatning barcha shahar va tumanlaridan 31 nafardan – jami 589 nafar bolajonlar uchun o‘tkazilgan to‘yda Farg‘ona viloyati hokimi Xayrullo Bozorov, viloyat faollari, bolalarning ota-onalari, yaqin qarindoshlari hamda do‘stlari ishtirok etdi.

Ijtimoiy ko‘makka muhtoj bo‘lgan, daftarlarga kiritilgan oilalarning farzandlari – maktabgacha ta’lim muassasalari tarbiyalanuvchilaridan iborat to‘ybolalarga sarpolar kiydirilib, homiy tashkilotlarning velosiped va boshqa qimmatbaho sovg‘alari topshirildi. Taniqli san’atkorlar ishtirokida konsert dasturi namoyish etildi.