Shavkat Mirziyoyevning ta’lim va sog‘liqni saqlashga mas’ul 65 yoshli maslahatchisi Abdujabbor Abduvohidov lavozimidan ozod etildi. Ushbu ma’lumotni “Daryo” manbasi tasdiqladi.
Qayd etilishicha, Prezident administratsiyasi rahbari Sardor Umrzoqov o‘tkazgan yig‘ilishda aholining juda ko‘p e’tirozlari aynan Abduvohidov mas’ul bo‘lgan sohalarga to‘g‘ri kelishi aytilgan.
Avvalroq Abdujabbor Abduvohidov Xalqaro kurash assotsiatsiyasi (IKA) vitse-prezidenti etib saylangani haqida xabar berilgan edi.
Abdujabbor Abdusattarovich Abduvohidov 1956-yil 16-dekabrda tug‘ilgan. O‘zbek davlat arbobi, olim va diplomat, tarix fanlari nomzodi.
Abduvohidov 2002—2011-yillarda Toshkentdagi Vestminster universiteti rektori lavozimida faoliyat yuritgan. 2011—2012-yillarda Jahon iqtisodiyoti va diplomatiya universiteti rektori bo‘lgan. So‘ngra Prezident huzuridagi Davlat boshqaruvi akademiyasiga rektorlik qilgan.
2018-yil 27-avgustda Shavkat Mirziyoyev farmoni bilan prezidentning yoshlar, fan, ta’lim, sog‘liqni saqlash va sport masalalari bo‘yicha maslahatchisi etib tayinlangan.
Izoh (0)