Latviya poytaxtida Rigani ozod qilganlar yodgorligining oxirgi elementi — sovet askarlari sharafiga o‘rnatilgan yodgorlik buzib tashlandi. Mamlakat ommaviy axborot vositalari tomonidan bir nechta videolar e’lon qilindi, shuningdek, yodgorlikning buzilishi jonli efirda namoyish etildi.
Qayd etilishicha, 79 metrli yodgorlik G‘alaba bog‘ida joylashgan bo‘lib, bu Rigani ozod qilganlar yodgorligining uchinchi qismi hisoblanadi. 25-avgust kuni ertalab ishchilar yodgorlikni demontaj qilishga kirishgan. Asosiy element – “Ona vatan” haykali bir kun avval — 24-avgust kuni buzib tashlangan.
22-avgust kuni Rigani ozod qilganlar haykalining buzilishiga qarshi o‘tkazilgan mitingda 7 kishi hibsga olingan edi.
Demontaj to‘g‘risidagi qaror ko‘p yillar davomida muhokama qilingan va 2022-yil may oyida qabul qilingan. Buning oldidan 9-may kuni haykalga gul qo‘yish bilan bog‘liq tadbirlar bo‘lib o‘tgan.
Izoh (0)