AQSH 25 yil ichida ilk bor o‘z elchisini Sudanga yubordi. Elchi Jon Godfri Sudan poytaxti Xartumga yetib keldi, deb yozmoqda Sudantribune.
Tegishli bayonotda AQSH elchixonasi Xartumga yuborilgan elchini Amerika va Sudan xalqlari o‘rtasidagi munosabatlarni mustahkamlash uchun mas’ul “AQSH hukumatining yuqori martabali vakili” sifatida ta’riflagan.
“Men Amerika—Sudan munosabatlarini chuqurlashtirishni hamda Sudan xalqining erkinlik, tinchlik, adolat va demokratiyaga intilishini qo‘llab-quvvatlashni intiqlik bilan kutmoqdaman”, — deb Twitter’da yozgan diplomat Xartumga kelganidan keyin.
1996-yilda Sudan terrorizm homiysi deb e’lon qilinganidan keyin AQSH Xartumdagi elchixonasini yopgandi. Sudan bir vaqtlar “Al-Qoida” rahbari Usama bin Ladenga boshpana bergan.
Vashington 2002-yilda elchixonani qayta ochgan, ammo u elchi darajasidan past diplomatik vakolatxona sifatida ishlagan. 2020-yilning may oyida Sudan 20 yil ichida ilk bor Vashingtonda o‘z elchisini tayinladi. 2021-yil noyabr oyida AQSH prezidenti Jo Bayden ma’muriyati Godfri Xartumga elchi etib tayinlanganini e’lon qildi.
Godfri Birlashgan Millatlar Tashkilotining Venadagi vakolatxonasida qurol nazorati bo‘yicha maslahatchi, shuningdek, Davlat kotibi o‘rinbosari Uilyam Berns shtabining boshlig‘i edi. U AQSHning Ar-Riyoddagi elchixonasida ham xizmat qilgan. 2021-yil yanvaridan terrorizmga qarshi kurash bo‘yicha koordinator vazifasini bajarib kelmoqda.
Izoh (0)