АҚШ 25 йил ичида илк бор ўз элчисини Суданга юборди. Элчи Жон Годфри Судан пойтахти Хартумга етиб келди, деб ёзмоқда Sudantribune.
Тегишли баёнотда АҚШ элчихонаси Хартумга юборилган элчини Америка ва Судан халқлари ўртасидаги муносабатларни мустаҳкамлаш учун масъул «АҚШ ҳукуматининг юқори мартабали вакили» сифатида таърифлаган.
«Мен Америка—Судан муносабатларини чуқурлаштиришни ҳамда Судан халқининг эркинлик, тинчлик, адолат ва демократияга интилишини қўллаб-қувватлашни интиқлик билан кутмоқдаман», — деб Twitter’да ёзган дипломат Хартумга келганидан кейин.
1996 йилда Судан терроризм ҳомийси деб эълон қилинганидан кейин АҚШ Хартумдаги элчихонасини ёпганди. Судан бир вақтлар «Ал-Қоида» раҳбари Усама бин Ладенга бошпана берган.
Вашингтон 2002 йилда элчихонани қайта очган, аммо у элчи даражасидан паст дипломатик ваколатхона сифатида ишлаган. 2020 йилнинг май ойида Судан 20 йил ичида илк бор Вашингтонда ўз элчисини тайинлади. 2021 йил ноябрь ойида АҚШ президенти Жо Байден маъмурияти Годфри Хартумга элчи этиб тайинланганини эълон қилди.
Годфри Бирлашган Миллатлар Ташкилотининг Венадаги ваколатхонасида қурол назорати бўйича маслаҳатчи, шунингдек, Давлат котиби ўринбосари Уильям Бернс штабининг бошлиғи эди. У АҚШнинг Ар-Риёддаги элчихонасида ҳам хизмат қилган. 2021 йил январидан терроризмга қарши кураш бўйича координатор вазифасини бажариб келмоқда.
Изоҳ (0)