Telegram messenjeri vakillari avvalroq Qozog‘iston hukumati tomonidan e’lon qilingan, “noqonuniy” kontentni o‘chirish bo‘yicha kelishuvga erishilgani haqidagi xabarni rad etdi, deb yozadi Asia Plus.
“Telegram Qozog‘iston hukumati bilan bunday bitimlar tuzmagan. Istalgan foydalanuvchi kontent haqida xabar berish uchun Telegram dasturida hisobot vositalaridan foydalanishi mumkin. Agar u Telegram’dan foydalanish shartlarini buzsa, kontent o‘chiriladi”, — dedi kompaniya vakili Remi Von.
Avvalroq “KazTAG” agentligi Raqamli rivojlanish, innovatsiyalar va aerokosmik sanoat vazirligi konsepsiyasiga tayanib, Qozog‘iston hukumati Telegram messenjeri, TikTok servisi va boshqa ommabop xalqaro resurslar egalari bilan “noqonuniy kontent”ni o‘chirish haqida kelishib olganini ma’lum qilgandi.
“Ushbu internet-kompaniyalar vakillari umuman olganda noqonuniy kontentni o‘chirish masalasida hamkorlik taklifini tushunish bilan qabul qilayotgani”, ammo “ijtimoiy tarmoqlar ma’muriyati fikricha, bunday choralar uzoq muddatli samara bermasligi, chunki noqonuniy materiallarning qaytadan yaratilishi ehtimoli kattaligi va bu ham yana ularning o‘chirilishini talab qilishi, bu sikl esa ko‘p marta takrorlanishi” aytilgandi.
Ta’kidlanishicha, iyul oxirida Qozog‘iston hukumati Axborot va jamoat taraqqiyoti vazirligiga yangi vakolatlar, shu jumladan, messenjerlar va ijtimoiy tarmoqlar ishini cheklash bo‘yicha vakolatlar berilishini ko‘zda tutuvchi qaror qabul qilgandi.
May boshida esa Qozog‘iston prezidenti Qosim-Jo‘mart To‘qayev kiberbulling to‘g‘risidagi qonunni imzolagan edi, unga muvofiq, bir oyda Qozog‘istondagi yuz mingdan ortiq foydalanuvchi kiradigan chet el ijtimoiy tarmoqlariga OAVlar sohasida vakolatli organ bilan hamkorlik qilish bo‘yicha o‘zining qonuniy vakilini tayinlash taklif etiladi.
Izoh (0)