Norvegiya va Buyuk Britaniya Ukrainaga Norvegiyada ishlab chiqarilgan hamda qiymati 9 million dollardan ortiq bo‘lgan Black Hornet mikrodronlarini bepul beradi. Bu haqda Norvegiya Mudofaa vazirligi ma’lum qildi.
“Norvegiya va Buyuk Britaniya Ukrainaga xayriya sifatida Norvegiyaning Black Hornet mikrodronini sotib olish uchun kuchlarni birlashtirmoqda. Ularning qiymati 90 million Norvegiya kronigacha (taxminan 9,2 million dollar) bo‘ladi”, — deyiladi vazirlik xabarida. Vazirlik matbuot xizmatining qo‘shimcha qilishicha, yetkazib berish Britaniya fondi tomonidan moliyalashtiriladi, Norvegiya hukumati unga 400 million kron kiritgan.
Black Hornet mikrodronlari norvegiyalik mutaxassislar tomonidan ishlab chiqilgan bo‘lib, AQSH va Britaniya qo‘shinlari ulardan razvedka va nishonni aniqlash uchun foydalanadi. Norvegiya mudofaa vaziri Byorn Arild Gram ular shahardagi harbiy harakatlar uchun juda mos ekanini ta’kidlagan.
Dronlar termal tasvir va datchiklar ishlab chiqaruvchi Teledyne Flir kompaniyasidan sotib olinadi. Ushbu qurollarni sotib olish, yetkazib berish va harbiylarni ulardan foydalanishga o‘rgatish ishlarini Britaniya hukumati tashkil qiladi.
Shuningdek, Norvegiya hukumati Kiyev uchun Britaniyaning SteelRock Technologies kompaniyasidan Nightfighter dronlardan himoya tizimini sotib olmoqchi. Uskunaning umumiy qiymati 100 million kronni tashkil etadi, bu uchun ham mablag‘ Britaniya fondidan ajratiladi.
Izoh (0)