Telegram мессенжери вакиллари аввалроқ Қозоғистон ҳукумати томонидан эълон қилинган, «ноқонуний» контентни ўчириш бўйича келишувга эришилгани ҳақидаги хабарни рад этди, деб ёзади Asia Plus.
«Telegram Қозоғистон ҳукумати билан бундай битимлар тузмаган. Исталган фойдаланувчи контент ҳақида хабар бериш учун Telegram дастурида ҳисобот воситаларидан фойдаланиши мумкин. Агар у Telegram’дан фойдаланиш шартларини бузса, контент ўчирилади», — деди компания вакили Реми Вон.
Аввалроқ «КазТАГ» агентлиги Рақамли ривожланиш, инновациялар ва аэрокосмик саноат вазирлиги концепциясига таяниб, Қозоғистон ҳукумати Telegram мессенжери, TikTok сервиси ва бошқа оммабоп халқаро ресурслар эгалари билан «ноқонуний контент»ни ўчириш ҳақида келишиб олганини маълум қилганди.
«Ушбу интернет-компаниялар вакиллари умуман олганда ноқонуний контентни ўчириш масаласида ҳамкорлик таклифини тушуниш билан қабул қилаётгани», аммо «ижтимоий тармоқлар маъмурияти фикрича, бундай чоралар узоқ муддатли самара бермаслиги, чунки ноқонуний материалларнинг қайтадан яратилиши эҳтимоли катталиги ва бу ҳам яна уларнинг ўчирилишини талаб қилиши, бу цикл эса кўп марта такрорланиши» айтилганди.
Таъкидланишича, июль охирида Қозоғистон ҳукумати Ахборот ва жамоат тараққиёти вазирлигига янги ваколатлар, шу жумладан, мессенжерлар ва ижтимоий тармоқлар ишини чеклаш бўйича ваколатлар берилишини кўзда тутувчи қарор қабул қилганди.
Май бошида эса Қозоғистон президенти Қосим-Жўмарт Тўқаев кибербуллинг тўғрисидаги қонунни имзолаган эди, унга мувофиқ, бир ойда Қозоғистондаги юз мингдан ортиқ фойдаланувчи кирадиган чет эл ижтимоий тармоқларига ОАВлар соҳасида ваколатли орган билан ҳамкорлик қилиш бўйича ўзининг қонуний вакилини тайинлаш таклиф этилади.
Изоҳ (0)