Норвегия ва Буюк Британия Украинага Норвегияда ишлаб чиқарилган ҳамда қиймати 9 миллион доллардан ортиқ бўлган Black Hornet микродронларини бепул беради. Бу ҳақда Норвегия Мудофаа вазирлиги маълум қилди.
«Норвегия ва Буюк Британия Украинага хайрия сифатида Норвегиянинг Black Hornet микродронини сотиб олиш учун кучларни бирлаштирмоқда. Уларнинг қиймати 90 миллион Норвегия кронигача (тахминан 9,2 миллион доллар) бўлади», — дейилади вазирлик хабарида. Вазирлик матбуот хизматининг қўшимча қилишича, етказиб бериш Британия фонди томонидан молиялаштирилади, Норвегия ҳукумати унга 400 миллион крон киритган.
Black Hornet микродронлари норвегиялик мутахассислар томонидан ишлаб чиқилган бўлиб, АҚШ ва Британия қўшинлари улардан разведка ва нишонни аниқлаш учун фойдаланади. Норвегия мудофаа вазири Бёрн Арилд Грам улар шаҳардаги ҳарбий ҳаракатлар учун жуда мос эканини таъкидлаган.
Дронлар термал тасвир ва датчиклар ишлаб чиқарувчи Теледйне Флир компаниясидан сотиб олинади. Ушбу қуролларни сотиб олиш, етказиб бериш ва ҳарбийларни улардан фойдаланишга ўргатиш ишларини Британия ҳукумати ташкил қилади.
Шунингдек, Норвегия ҳукумати Киев учун Британиянинг SteelRock Technologies компаниясидан Нигҳтфигҳтер дронлардан ҳимоя тизимини сотиб олмоқчи. Ускунанинг умумий қиймати 100 миллион кронни ташкил этади, бу учун ҳам маблағ Британия фондидан ажратилади.
Изоҳ (0)