АҚШ ҳарбий ёрдам доирасида Украинага баъзи турдаги қурол-яроғлар етказиб берилаётгани ҳақида маълум қилмаётган бўлиши мумкин, деб ёзади Politico.
Нашр маълумотларига кўра, Пентагоннинг юқори мансабли амалдори 19 август куни эътироф этишича, АҚШ бир қанча вақт мобайнида Киевга HARM радиолокацияга қарши ракеталарни етказиб берган, аммо бу ҳақда оммага эълон қилинмаган.
«Биз HARM ракеталари етказиб берилиши ҳақида биринчи марта эълон қилганимизда, улар баёнотда аниқ қилиб тилга олинмади. Биз буни радиолокацияга қарши имкониятлар тақдим этаяпмиз, деб таърифладик», — деди мансабдор.
Шундан кейин Yahoo News Вашингтон Киевга АТАCМS оиласига тегишли бошқарилувчи тезкор-тактик баллистик ракеталарни тақдим этганини тахмин қилди.
Газетага манбалари маълум қилишича, 19 август куни эълон қилинган янги ҳарбий ёрдам пакетига Excalibur бошқарилувчи артиллерия снарядлари кирган, улар ҳам Пентагоннинг Украинага тақдим этиладиган қурол-яроғлар ҳақидаги расмий баёнотида бўлмаган.
Бундан ташқари, Politico Киевга навбатдаги ёрдам пакети ажратилиши муносабати билан АҚШ маъмурияти томонидан Конгрессга тақдим этилган расмий билдиришнома билан танишиб чиққан, унда Вашингтон томонидан Украинага етказиб берилаётган нарсалар рўйхатда кўрсатилганлар билан «чекланмаслиги» ҳақида ёзилган.
Нашр таъкидлашича, бу фақат тахминдир, чунки маъмурият аъзоларининг ҳеч бири Украинага махфий равишда қурол етказилаётганини тасдиқламаган ва ҳатто ишора ҳам қилмаган.
«Агар бундай ишлар амалга оширилганида ҳам, АҚШ ҳукумати бизга бу махфий қарор ҳақида хабар бериши эҳтимоли кам», — дея хулоса қилди Politico.
Эслатиб ўтамиз, 19 август куни АҚШ Украинага 775 миллион долларлик навбатдаги ёрдам пакетини ажратди. У HIMARS баравар ўт очиш реактив тизими учун ўқ-дорилар, 16 та гаубица, мингта Javelin танкка қарши ракеталари, разведка учун 15 та ScanEagle дронлари, 40 та зирҳли машина, HARM радиолокацияга қарши ракеталар, 1,5 мингта ТОW танкка қарши ракета мажмуалари, минадан тозалаш воситалари ва Hummer ҳарбий автомобилларини ўз ичига олди.
Изоҳ (0)