Rossiya Federal xavfsizlik xizmati (FXX) faylasuf va siyosatshunos Aleksandr Duginning qizi Darya Duginaning o‘ldirilishi bilan bog‘liq jinoyatni fosh qilgani haqida xabar berdi, deb yozadi Meduza.
Maxsus xizmat ma’lumotlariga ko‘ra, “jinoyat Ukraina maxsus xizmatlari tomonidan tayyorlanilgan va amalga oshirilgan”. Qotillikda 1979-yilda tug‘ilgan Ukraina fuqarosi Natalya Vovk gumonlanmoqda, uni FXX jinoyat ijrochisi deb atadi.
Idora ma’lum qilishicha, 23-iyul kuni Vovk 12 yoshli qizi Sofiya Shaban bilan birga Rossiyaga kelgan. Ular Moskvada Darya Dugina yashaydigan uydan xonadon ijaraga olgan. FXX qayd etishicha, Dugina Mini Cooper avtomobili orqali kuzatilgan, uning raqam belgilari uch marta — Qozog‘iston, Ukraina va DXR raqamlariga o‘zgartirilgan.
Qotillik yuz bergan kuni, FXX versiyasiga ko‘ra, Vovk va uning qizi Dugina faxriy mehmon sifatida qatnashgan “Traditsiya” adabiy-musiqiy festivaliga borgan. Duginaning avtomobili masofadan turib portlatilgach, Vovk va uning qizi Pskov viloyati orqali Estoniyaga o‘tib ketgan.
Keyinroq FXX Darya Duginani o‘ldirishda gumonlanayotgan Natalya Vovkning videosini tarqatdi. Unda Vovk Rossiyaga kirib kelayotgani, Dugina yashaydigan uy podyezdiga kirayotgani va Rossiyadan Estoniyaga o‘tib ketayotgani aks etgan. Shuningdek, rolikda Vovk avtomobilining raqamlaridan iborat skrinshotlar ham bor.
Darya Dugina 20-avgust kuni Moskva viloyatida o‘zi boshqarib ketayotgan avtomobil portlashi oqibatida halok bo‘ldi. Duginlarning tanishlari aytishicha, bu mashinadan odatda uning otasi foydalangan. OAVlar yozishicha, hodisa versiyalari orasida Aleksandr Duginga suiqasd varianti ham bor.
Mavzuga doir: Darya Duginaning mashinasi masofadan turib portlatilgan
Izoh (0)