Rossiya prezidenti Vladimir Putin va Xitoy Xalq Respublikasi raisi Si Szinpin noyabr oyida Balida bo‘lib o‘tadigan G20 sammitida shaxsan ishtirok etishni rejalashtirmoqda. Bu haqda Bloomberg nashriga bergan intervyusida Indoneziya prezidenti Joko Vidodo ma’lum qildi, deb yozadi “RBK”.
“Si Szinpin keladi. Prezident Putin ham menga kelishini aytdi”, — dedi Vidodo. U birinchi marta ikkala yetakchi ham tadbirda qatnashmoqchi ekanini tasdiqladi.
Xitoy Tashqi ishlar vazirligi Si Szinpinning rejalari haqida Bloomberg tomonidan yo‘naltirilgan savolga javob bermagan. Agentlik qayd etishicha, u koronavirus pandemiyasi boshlanganidan buyon xorijga chiqmagan. Kreml izoh berishdan bosh tortdi, biroq vaziyatdan xabardor manba Putin uchrashuvga borishni rejalashtirayotganini tasdiqladi.
Avvalroq Vidodo Putin bilan telefon orqali suhbatlashgan edi. Kreml xabariga ko‘ra, ular, shu jumladan, Balidagi sammitga tayyorgarlikni muhokama qilgan. Putinning orolga kelish bo‘yicha ehtimoliy rejalari haqida hech narsa deyilmagandi. Iyun oxirida prezidentlar Moskvada yuzma-yuz ko‘rishgandi.
Agar safar amalga oshsa, Putin Rossiyaning Ukrainadagi harbiy operatsiyasi boshlanganidan buyon birinchi marta G‘arb davlatlari yetakchilari bilan shaxsan uchrashadi — fevral oxiridan buyon Putin ularning ba’zilari bilan faqat telefon orqali muloqot qilgandi (Germaniya kansleri Olaf Shols va Fransiya prezidenti Emmanuel Makron bilan), aprel oyida Moskvaga kelgan Avstriya kansleri Karl Nexammerni hisobga olmaganda.
Bloomberg qayd etishicha, Putin Ukraina prezidenti Vladimir Zelenskiy bilan ham uchrashishi mumkin, uni sammitga Vidodo taklif qilgan.
Indoneziya hukumati Putinni sammitga taklif etgani haqida apreldayoq ma’lum qilgan, biroq Kremlning javobi haqida rasman 27-iyundagina e’lon qilingandi.
Sammit 15—16-noyabr kunlari bo‘lib o‘tadi.
Izoh (0)