Zelenskiy Erdo‘g‘on va Guterrish bilan uchrashuvdan keyin: Rossiya qo‘shinlari Ukrainani tark etsa, RF bilan muzokaralar o‘tkazish mumkin. Erdo‘g‘on Putin bilan uchrashuvni muhokama qilishga va’da berdi

Agar Rossiya qo‘shinlari Ukrainaning bosib olingan hududlarini tark etsa, Rossiya bilan muzokaralar o‘tkazish mumkin bo‘ladi. Bu haqda Ukraina prezidenti Vladimir Zelenskiy Turkiya prezidenti Rajab Toyyib Erdo‘g‘on va BMT bosh kotibi Antoniu Guterrish bilan Lvovda bo‘lib o‘tgan muzokaralardan keyin ma’lum qildi, deb yozadi Meduza.

Zelenskiyning so‘zlariga ko‘ra, Erdo‘g‘on uchrashuv chog‘ida Ukraina donini eksport qilish bo‘yicha tashabbus urushni to‘xtatish haqidagi kelishuvlar uchun “diplomatik darcha” ochishini aytgan.

“Men Turkiyaning janob prezidentiga Rossiyaga ishonch yo‘qligi haqida o‘z fikrimni aytdim. Mening fikrimcha, bu ‘darcha’da Rossiya quroli bor. Ular (Rossiya) qanaqadir sulhga tayyorligidan juda hayratdaman. O‘ldiradigan, zo‘ravonlik qiladigan, har kuni shaharlarimizni o‘qqa tutadigan odamlar tinchlik tarafdori bo‘lishi mumkin emas. Shuning uchun, dastlab, menimcha, ular bizning hududlarimizni ozod etishi kerak, keyin esa… Keyin nima bo‘lishi keyin ma’lum bo‘ladi”, — dedi Ukraina prezidenti.

Ukraina tashqi ishlar vaziri Dmitriy Kuleba uch tomonlama muzokaralardan keyin Ukrainani “hech kim Rossiya foydasiga yon berishga undamagani”ni aytdi.

O‘z navbatida, Erdo‘g‘onning fikricha, xalqaro hamjamiyat Ukrainadagi vaziyat bo‘yicha diplomatik jarayonni “jonlantirish” uchun o‘ziga ko‘proq mas’uliyat olishi kerak. Turkiya prezidenti Rossiya prezidenti Vladimir Putin bilan Lvovdagi uch tomonlama uchrashuv natijalarini muhokama qilmoqchi.

Muzokaralarning uchinchi ishtirokchisi — BMT bosh kotibi Guterrish ofisi tomonlar vaziyatni tartibga solishni muhokama qilganini tasdiqladi. “Ammo biz jangovar harakatlarni to‘liq to‘xtatish bo‘yicha sa’y-harakatlarni muhokama qilishimiz mumkin bo‘lgan vaqtdan hali juda uzoqdamiz”, — dedi BMT matbuot xizmati vakili.

Uch tomonlama sammit oldidan CNN Turk Vladimir Putin Erdo‘g‘on bilan avgust boshida Sochida bo‘lib o‘tgan uchrashuv chog‘ida Zelenskiy bilan muzokaralar imkoniyatiga ishora qilgani haqida xabar bergandi. Telekanal manbalari qayd etishicha, bunday uchrashuv istiqbollari Ukraina yetakchisining Erdo‘g‘on va Guterrish bilan sammiti natijalariga bog‘liq bo‘ladi.