Buyuk Britaniyada 1970—1980-yillarda qon quyish orqali OIV va gepatit C yuqtirib olgan hamda bugungi kunda ham tirik bo‘lgan minglab bemorlar 100 000 funt sterling (120 ming dollar) miqdorida tovon puli oladi. Bu haqda bosh vazir Boris Jonsonning bayonotiga tayanib, The Independent nashri xabar berdi.
“Bunday ayanchli adolatsizlikka uchraganlarning azob-uqubatlari o‘rnini hech narsa bilan qoplab bo‘lmasa-da, biz qurbonlar va fojiali tarzda o‘z juftini yo‘qotganlar uchun kompensatsiya to‘lash choralarini ko‘ryapmiz” — dedi u.
Jabrlanuvchilarning da’vo qilishicha, kompensatsiya OIVdan jabrlanganlarning aksariyatiga yordam bermaydi, chunki to‘lov kasallanganlarning oila a’zolariga emas faqat juftlariga taalluqli bo‘ladi. Qayd etilishicha, kompensatsiya oladiganlar ro‘yxatini kengaytirish tergov ishlari yakunlanganidan keyin amalga oshirilishi mumkin. Qon quyish orqali infeksiyaga chalinganlar bo‘yicha tergov 2017-yilda boshlangan va 2023-yilda tugashi kerak. Ish bo‘yicha hozirga qadar 5000 ga yaqin guvohning ko‘rsatmalari to‘plangan.
Jabrlanuvchilarning aksariyati ilgari gemofiliya yoki qon ivishining buzilishi bilan og‘rigan va ularga qon ivishi bo‘yicha VIII omil preparati berilgan. Bu dori Amerikada ishlab chiqarilgan bo‘lib, u donorligi uchun haq to‘langan odamlardan olingan, ular orasida giyohvandlar va mahkumlar ham bo‘lgan. Bemorlar hukumatning ogohlantirishlariga qaramay, uzoq yillar davomida ushbu dorini iste’mol qilgan. OIV va gepatit holatlari ham o‘nlab yillar davomida aniqlangan.
The Independent ta’kidlashicha, 2,4 mingga yaqin odam ushbu infeksiyalar oqibatida vafot etgan.
Izoh (0)