Ukraina infratuzilma vaziri Aleksandr Kubrakov va Turkiya savdo vaziri Mehmet Mush nizo natijasida vayron bo‘lgan Ukraina infratuzilmasini qayta tiklash haqida bitim imzoladi, deb yozadi “RBK”.
Haber telekanali ma’lumotlariga ko‘ra, shartnoma ikki mamlakat tomonidan Ukrainani qayta tiklash bo‘yicha Maqsadli guruh tuzilishini ko‘zda tutadi. Guruh yo‘llar, ko‘priklar, suv va elektr ta’minoti obyektlari, kasalxonalar va maktablar kabi ijtimoiy va iqtisodiy obyektlar rekonstruksiyasini muvofiqlashtirish bilan shug‘ullanadi.
Hujjatlar Ukraina va Turkiya prezidentlari Vladimir Zelenskiy va Rajab Toyyib Erdo‘g‘on ishtirokida imzolandi. Turkiya yetakchisi BMT bosh kotibi Antoniu Guterrish bilan Lvovga matbuot uchun yopiq bo‘lgan uch tomonlama uchrashuvni o‘tkazish uchun kelgandi.
Ukraina mamlakatni tiklash uchun zarur summani 750 milliard dollarga baholamoqda, ushbu qiymatni Kiyev delegatsiyasi iyul boshida Shveysariyada bo‘lib o‘tgan maxsus konferensiyada ma’lum qilgandi. Tomonlar Ukrainaga 1,9 milliard dollar kredit ajratishga kelishib oldi, bosh vazir Denis Shmegal aniqlik kiritishicha, gap 600 million dollarlik moliyaviy ko‘mak, agrar sektorni rivojlantirish uchun 500 million dollar, isitish mavsumiga tayyorgarlik ko‘rish uchun 500 million dollar va mamlakatning raqamli transformatsiyasi uchun qariyb 250 million dollar haqida bormoqda.
Ukrainani qayta tiklash uchun yiliga taxminan 30—100 milliard dollar ajratish kerak, degandi iyul oxirida Ukraina prezidenti ofisi rahbari maslahatchisi Timofey Milovanov. Uning aniqlik kiritishicha, shundan yiliga 20—30 milliardi makroiqtisodiyotni qo‘llab-quvvatlashga yo‘naltiriladi, xuddi shuncha summa armiyani qo‘llab-quvvatlash uchun talab etiladi.
Ukraina prezidenti Vladimir Zelenskiy Turkiya prezidenti Rajab Toyyib Erdo‘g‘on va BMT bosh kotibi Antoniu Guterrish bilan Lvovda bo‘lib o‘tgan muzokaralardan keyin agar Rossiya qo‘shinlari Ukrainaning bosib olingan hududlarini tark etsa, Rossiya bilan muzokaralar o‘tkazish mumkin bo‘lishini ma’lum qildi.
Izoh (0)