O‘zbekistonda 2025-yilning birinchi yarmida 1 million nafarga yaqin fuqaro o‘z kredit tarixini tekshirtirdi.
Kredit-axborot tahliliy markazi ma’lumotlariga ko‘ra, kredit hisobotlaridan foydalanganlar soni 957 402 nafarni tashkil etdi. Shundan 99 foizi jismoniy shaxslar, 1 foizi esa yuridik shaxslardir. Kredit hisobotlaridan foydalanganlar soni 2024-yilning shu davriga (400 950) nisbatan qariyb 2,4 barobarga oshdi.
Yosh toifasiga ko‘ra bu quyidagicha bo‘ldi:
- 26—35 yoshdagilar — 41 foiz (388 456 kishi),
- 36—45 yoshdagilar — 23 foiz (222 247 kishi),
- 16—25 yoshdagilar — 22 foiz (205 009 kishi),
- 46—55 yoshdagilar — 9 foiz (88 093 kishi),
- 56 yosh va undan kattalar — 5 foiz (44 940 kishi).
Skoring ballari tahliliga ko‘ra, murojaat qilgan fuqarolarning atigi 5 foizi (44 482) a’lo darajadagi skoringga ega bo‘lgan, 28 foizida yaxshi, 55 foizida esa o‘rtacha ko‘rsatkich bo‘lgan.
Kredit byurosidan hech qanday sabablarni ko‘rsatmasdan, yiliga faqat bir marta tekinga va istalgancha pullik asosda o‘z kredit tarixingiz to‘g‘risidagi ma’lumotni olish mumkin.
Kredit-axborot tahliliy markazi ma’lumotlariga ko‘ra, 2025-yil birinchi yarmida jismoniy shaxslarning aksariyati kredit tarixini olishga bir marta murojaat qilgan bo‘lib, ularning ulushi 63 foizni tashkil etadi. Ikki marta murojaat qilganlar 23 foiz, uch marta foydalanganlar 6 foiz, to‘rt marta foydalanganlar 2 foiz, besh va undan ko‘p marta foydalanganlar esa yana 6 foizni tashkil qilgan. Murojaat qilganlarning 69 foizi erkaklar, 31 foizi ayollar bo‘lgan.
Hududlar kesimida eng ko‘p murojaat Toshkent shahrida qayd etilgan — 19,4 foiz, undan keyingi o‘rinlarni Toshkent viloyati (11,9 foiz) va Samarqand viloyati (8,3 foiz) egalladi.
O‘zbekistonda banklarga moliyaviy qiyinchiliklar va murakkab hayotiy vaziyatlarga tushib qolgan, shuningdek, fors-major holatlari tufayli o‘z vaqtida kredit to‘lovlarini amalga oshira olishga qiynalayotgan qarz oluvchilarning amaldagi kreditlari bo‘yicha shartnoma shartlariga o‘zgartirish va qo‘shimchalar kiritish (restrukturizatsiya) imkoniyatlari borasidagi arizalarini ko‘rib chiqish yuzasidan ichki tartibga ega bo‘lishi talab etilishi kutilmoqda. Shuningdek, qarz oluvchilar maxsus chek-list to‘ldirishi joriy etiladi. Fuqaro uni diqqat bilan o‘qib chiqishi va har bir bandni tushunganini tasdiqlashi kerak.
Izoh (0)