Amnesty International inson huquqlari tashkiloti 18-avgust kuni Isroilni G‘azoda falastinliklarga nisbatan atayin ochlik siyosati yuritishda aybladi. Bu haqda Al Arabiya xabar berdi.
BMT va bir qator xalqaro yordam tashkilotlar hududda ocharchilik xavfi kuchayayotganini ogohlantirayotgan bir paytda, Isroil G‘azo sektoriga gumanitar yordam kirishini keskin cheklab, bu ayblovlarni rad etib kelmoqda. Amnesty International tomonidan e’lon qilingan hisobotda ko‘chirilgan falastinliklar va bolalarni davolagan shifokorlarning guvohliklari keltirilgan. Unda aytilishicha, Isroil G‘azoda falastinliklarning sog‘lig‘i, turmush tarzi va ijtimoiy hayotini “tizimli ravishda barbod qilmoqda”.
“Bu 22 oydan beri davom etayotgan rejalashtirilgan siyosatning oqibatidir. Isroil falastinliklarni jismonan yo‘q qilishga olib keladigan sharoitlarni ataylab yaratmoqda. G‘azoda genotsid sodir etilmoqda”, deyiladi hisobotda.
Tashkilot vakillari so‘nggi haftalarda vaqtinchalik lagerlarda yashayotgan 19 nafar ko‘chirilgan falastinlik hamda G‘azo shahridagi 2 ta kasalxonada ishlayotgan shifokorlar bilan suhbat o‘tkazgan. Isroil armiyasi va Tashqi ishlar vazirligi AFP nashrining bu boradagi savollariga hozircha izoh bermayapti. Shu bilan birga, Isroil Mudofaa vazirligiga qarashli COGAT boshqarmasi yaqinda e’lon qilgan bayonotida G‘azoda keng ko‘lamli ocharchilik mavjudligi haqidagi da’volar rad etilgan.
Amnesty International tashkiloti bundan oldin ham, aprel oyida, Isroilni G‘azoda falastinliklarni majburiy ko‘chirish orqali amalga oshirilgan genotsidda ayblagan edi. O‘sha vaqtda Isroil bu da’volarni “ochiq yolg‘on” deb baholagan.
Izoh (0)