Россия президенти Владимир Путин ва Хитой Халқ Республикаси раиси Си Цзиньпин ноябрь ойида Балида бўлиб ўтадиган G20 саммитида шахсан иштирок этишни режалаштирмоқда. Бу ҳақда Bloomberg нашрига берган интервьюсида Индонезия президенти Жоко Видодо маълум қилди, деб ёзади «РБК».
«Си Цзиньпин келади. Президент Путин ҳам менга келишини айтди», — деди Видодо. У биринчи марта иккала етакчи ҳам тадбирда қатнашмоқчи эканини тасдиқлади.
Хитой Ташқи ишлар вазирлиги Си Цзиньпиннинг режалари ҳақида Bloomberg томонидан йўналтирилган саволга жавоб бермаган. Агентлик қайд этишича, у коронавирус пандемияси бошланганидан буён хорижга чиқмаган. Кремль изоҳ беришдан бош тортди, бироқ вазиятдан хабардор манба Путин учрашувга боришни режалаштираётганини тасдиқлади.
Аввалроқ Видодо Путин билан телефон орқали суҳбатлашган эди. Кремль хабарига кўра, улар, шу жумладан, Балидаги саммитга тайёргарликни муҳокама қилган. Путиннинг оролга келиш бўйича эҳтимолий режалари ҳақида ҳеч нарса дейилмаганди. Июнь охирида президентлар Москвада юзма-юз кўришганди.
Агар сафар амалга ошса, Путин Россиянинг Украинадаги ҳарбий операцияси бошланганидан буён биринчи марта Ғарб давлатлари етакчилари билан шахсан учрашади — февраль охиридан буён Путин уларнинг баъзилари билан фақат телефон орқали мулоқот қилганди (Германия канцлери Олаф Шольц ва Франция президенти Эммануэль Макрон билан), апрель ойида Москвага келган Австрия канцлери Карл Нехаммерни ҳисобга олмаганда.
Bloomberg қайд этишича, Путин Украина президенти Владимир Зеленский билан ҳам учрашиши мумкин, уни саммитга Видодо таклиф қилган.
Индонезия ҳукумати Путинни саммитга таклиф этгани ҳақида апрелдаёқ маълум қилган, бироқ Кремлнинг жавоби ҳақида расман 27 июндагина эълон қилинганди.
Саммит 15—16 ноябрь кунлари бўлиб ўтади.
Изоҳ (0)