Farg‘ona viloyatida 60 nafar nuroniy “Mehnat faxriysi” ko‘krak nishoni bilan taqdirlandi. Bu haqda “Daryo” muxbiri Azizjon Ermatov xabar bermoqda.
Qayd etilishicha, Farg‘ona shahridagi “Afrosiyob” tantanalar saroyida mustaqillikning 31 yilligi oldidan “Yangi O‘zbekistonda el aziz, inson aziz” shiori ostida bir guruh nuroniylarni “Mehnat faxriysi” ko‘krak nishoni bilan taqdirlash marosimi o‘tkazilgan.
Tantanali marosimda viloyat hokimi Xayrullo Bozorov hamda “Nuroniy” jamg‘armasi boshqaruvi raisi Sodiqjon Turdiyev I, II, III darajali “Mehnat faxriysi” nishonlarini o‘z egalariga topshirgan.
300 nafardan ziyod nuroniylar jam bo‘lgan tadbirda farg‘onalik san’at ustalari ishtirokida konsert dasturi namoyish etilgan.
Ma’lumot uchun, “Mehnat faxriysi” ko‘krak nishoni O‘zbekiston prezidentining 2016-yil 28-dekabrdagi “O‘zbekiston faxriylarni ijtimoiy qo‘llab-quvvatlash “Nuroniy” jamg‘armasi faoliyatini yanada takomillashtirish chora-tadbirlari to‘g‘risida”gi Farmoniga muvofiq ta’sis etilgan.
Ushbu nishon bilan mamlakatning iqtisodiyot, ishlab chiqarish, ilm-fan, madaniyat, ta’lim, sog‘liqni saqlash hamda boshqa sohalarida ko‘p yillar davomida halol va samarali mehnat qilgan nafaqa yoshidagi yurtdoshlar, shuningdek, ishlamaydigan, hayotini oilalar mustahkamligini saqlash, farzandlarini jamiyat oldida mas’uliyat, milliy hamda umuminsoniy qadriyatlarga, kattalarga va yosh avlod vakillariga hurmat, ona Vatanga muhabbat, istiqlol g‘oyalariga sadoqat ruhida tarbiyalash ishlariga bag‘ishlab, jamiyatda hurmat qozongan onalar taqdirlanadi.
Izoh (0)