Фарғоналик 60 нафар фахрийга «Меҳнат фахрийси» кўкрак нишони топширилди

Фарғона вилоятида 60 нафар нуроний «Меҳнат фахрийси» кўкрак нишони билан тақдирланди. Бу ҳақда «Дарё» мухбири Азизжон Эрматов хабар бермоқда.

Қайд этилишича, Фарғона шаҳридаги «Афросиёб» тантаналар саройида мустақилликнинг 31 йиллиги олдидан «Янги Ўзбекистонда эл азиз, инсон азиз» шиори остида бир гуруҳ нуронийларни «Меҳнат фахрийси» кўкрак нишони билан тақдирлаш маросими ўтказилган.

Тантанали маросимда вилоят ҳокими Хайрулло Бозоров ҳамда «Нуроний» жамғармаси бошқаруви раиси Содиқжон Турдиев I, II, III даражали «Меҳнат фахрийси» нишонларини ўз эгаларига топширган.

300 нафардан зиёд нуронийлар жам бўлган тадбирда фарғоналик санъат усталари иштирокида концерт дастури намойиш этилган.

Маълумот учун, «Меҳнат фахрийси» кўкрак нишони Ўзбекистон президентининг 2016 йил 28 декабрдаги «Ўзбекистон фахрийларни ижтимоий қўллаб-қувватлаш «Нуроний» жамғармаси фаолиятини янада такомиллаштириш чора-тадбирлари тўғрисида»ги Фармонига мувофиқ таъсис этилган.

Ушбу нишон билан мамлакатнинг иқтисодиёт, ишлаб чиқариш, илм-фан, маданият, таълим, соғлиқни сақлаш ҳамда бошқа соҳаларида кўп йиллар давомида ҳалол ва самарали меҳнат қилган нафақа ёшидаги юртдошлар, шунингдек, ишламайдиган, ҳаётини оилалар мустаҳкамлигини сақлаш, фарзандларини жамият олдида масъулият, миллий ҳамда умуминсоний қадриятларга, катталарга ва ёш авлод вакилларига ҳурмат, она Ватанга муҳаббат, истиқлол ғояларига садоқат руҳида тарбиялаш ишларига бағишлаб, жамиятда ҳурмат қозонган оналар тақдирланади.