O‘zbekistonda bitiruvchilarni hunarga tayyorlash bo‘yicha 46 ta kasb ro‘yxati tuzildi

O‘zbekistonda umumta’lim maktablarining 10—11-sinf o‘quvchilarini kasb-hunarga o‘qitish, ularning qiziqish va qobiliyatlaridan kelib chiqib, kelajakda egallagan kasblari bo‘yicha mehnat faoliyati bilan shug‘ullanishlariga sharoit yaratish maqsadida bitiruvchilarning kasb egallashiga ko‘maklashuvchi yangi tizim joriy etildi. Bu haqda Oliy va o‘rta maxsus ta’lim vazirligi xabar qildi.

Qayd etilishicha, vazirlik Xalq ta’limi hamda Bandlik va mehnat munosabatlari vazirliklari bilan hamkorlikda 10–11-sinf o‘quvchilarini kasb-hunarga tayyorlash bo‘yicha 46 ta kasb ro‘yxatini tuzgan.

Ushbu kasblarni 10–11-sinf o‘quvchilariga o‘qitish uchun umumiy o‘quv yuklama soatlari, kasb murakkabligidan kelib chiqib, malaka talablari, o‘quv reja va dasturlari ishlab chiqilgan.

Mazkur me’yoriy hujjatlardan 2022/2023-o‘quv yilida 10–11-sinf o‘quvchilarini kasbga o‘rgatishda foydalaniladi.

Me’yoriy hujjatlarni edu.profedu.uz platformasi orqali ko‘chirib olish mumkin.