Andijon shahar adliya bo‘limi aralashuvi bilan ikki nafar tadbirkorga hokimlikdan 1 milliard so‘mdan ortiq kompensatsiya pullari undirib beriladigan bo‘ldi. Bu haqda “Daryo”ga viloyat adliya boshqarmasi axborot xizmati xabar bermoqda.
Ma’lum qilinishicha, Andijon shahar adliya bo‘limiga “Nodira” xususiy korxonasi va “Gigant golden” MCHJ rahbarlari murojaat qilib, ushbu korxonalarga tegishli bo‘lgan savdo do‘konining bino-inshootlari Andijon shahar hokimligi tomonidan davlat va jamoat ehtiyojlari uchun olib qo‘yilib, buzilganligi sababli kompensatsiya to‘lanmaganini ma’lum qilgan.
O‘rganish davomida Andijon shahar hokimining 2015- va 2018-yillardagi qarorlariga asosan “Gigant golden” MCHJga tegishli Andijon shahar, A.Fitrat ko‘chasidagi 180,42 kv/metr yer uchastkasida joylashgan savdo do‘koni bino-inshooti buzilishga tushgan. Shu munosabat bilan 2019-yilda bino buzilib, yer maydoni shahar hokimligi zaxirasiga olib qo‘yilgan. Shuningdek, Andijon shahar hokimligi bilan mulkdor o‘rtasida 2019-yil 16-avgustda tasdiqlangan kelishuv shartnomasiga ko‘ra, savdo do‘koni buzilishga tushganligi sababli, tovon puli o‘rniga shahar hokimligi tomonidan hokimlik zaxirasidagi yer maydonlaridan yakka tartibda turar-joy binolari qurish uchun har biri 400,0 kv.metrdan iborat 3 dona yer uchastkasi ajratib berish majburiyatini olgan.
“Biroq ikki yil davomida kelishuv shartnomasi shartlari bajarilmasdan qolib ketgan. Bundan tashqari prezidentimizning tegishli farmonlariga asosan 2021-yilning 1-agustidan mahalliy davlat hokimiyati organlarining yer uchastkalarini to‘g‘ridan-to‘g‘ri ajratish, foydalanishga berish, kelgusida ajratish uchun zaxiralash, biriktirish, obodonlashtirish uchun berish yoki yerlarni boshqacha yo‘l bilan tasarruf qilish bo‘yicha vakolatlari bekor qilingan. Natijada shahar hokimligi tomonidan ‘Gigant golden’ MCHJga ilgari olib qo‘yilgan yer maydoniga teng qiymatli yer maydoni ajratib berishning imkoni yo‘qolgan. O‘rganish davomida Andijon shahar hokimligi tomonidan ‘Nodira’ xususiy korxonasi hamda ‘Gigant golden’ MCHJga olib qo‘yilgan yer maydoni va buzilgan bino-inshootlari uchun kompensatsiya to‘lovlari to‘liq to‘lab berilmaganligi aniqlandi. Shunga ko‘ra, adliya bo‘limi tomonidan tadbirkorlarga zararni undirib berishni so‘rab, Andijon tumanlararo iqtisodiy sudiga da’vo arizalar kiritildi”, — deydi shahar adliya bo‘limi boshlig‘i Ozodbek G‘ofurov.
Sudning 2022-yil 22-iyuldagi hal qiluv qarorlariga asosan da’volar to‘liq qanoatlantirilib, Andijon shahar hokimligidan “Nodira” xususiy korxonasi foydasiga buzilgan savdo do‘koni bino-inshooti uchun baholash xulosasi asosida 672 million 790 ming 220 so‘m kompensatsiya to‘lovi va 2 million 241 ming so‘m moddiy zarar, “Gigant golden” MCHJ foydasiga esa 403 million 674 ming 132 so‘m kompensatsiya to‘lovi va 4 million 493 ming 205 so‘m moddiy zararni undirish belgilangan.
Izoh (0)