Buyuk Britaniyadagi qandolat fabrikalari, novvoyxonalar mahsulotlar narxi va energiya to‘lovlarining keskin oshib ketayotgani tufayli bir qator muammolarga duch kelmoqda. Bu haqda Bloomberg xabar berdi.
Mamlakatda bu yil inflyatsiya 13 foizdan oshib ketishi kutilmoqda. Hozirda Buyuk Britaniyadagi uy xo‘jaliklarining uchdan bir qismi daromadining 10 foizdan ko‘prog‘ini energiyaga sarflashga majbur.
Shunday vaziyatda narxlarning yanada o‘sishi aholi orasida oziq-ovqat qashshoqligini oshirmoqda.
Joriy yil boshida Ukrainadagi urush tufayli dunyoda asosiy mahsulotlar, jumladan, bug‘doy va o‘simlik moylarining jahon narxlari rekord darajaga yetdi. Garchi iyul oyida narxlar biroz pastlagan bo‘lsa-da, bu vaziyat o‘nglanishidan darak emas.
Buning sababi, Yevropadagi oziq-ovqat ishlab chiqaruvchilari hozirda yuqori energiya narxlari, gaz, ko‘mir va elektr uchun to‘lovlar odatdagidan bir necha baravar ko‘p bo‘lishi bilan kurashmoqda. Oldindagi sovuq qish kunlari esa xavotirlarni oshirmoqda.
Fediol sanoat guruhi ma’lumotlariga ko‘ra, Buyuk Britaniya va Yevropa Ittifoqida yog‘li o‘simliklarni qayta ishlash iyun oyida 3,2 foizga tushib, 2019-yildan beri eng past darajaga yetgan.
Agar tabiiy gaz taqchilligi kuchayib borsa, Yevropadagi energiya ko‘p talab qiladigan oziq-ovqat zavodlar faoliyatini to‘xtatishga majbur bo‘lishi mumkin.
Germaniya allaqachon uch bosqichli favqulodda vaziyat rejasining ikkinchisini qabul qilgan. Keyingi bosqich esa sanoatning to‘xtab qolishiga olib kelishi mumkin.
Avvalroq Yevropa va Osiyo gaz uchun kurashni kuchaytirayotgani haqida xabar berilgandi.
Izoh (0)