O‘zbekiston 2022-yilning yanvar—iyun oylarida 21 ta xorijiy davlatdan qiymati 21,8 mln dollarga teng bo‘lgan 16,1 ming tonna choy import qilgan. Bu haqda Davlat statistika qo‘mitasi matbuot xizmati xabar bermoqda.
Choy importi o‘tgan yilning mos davri bilan solishtirilganda 788 tonnaga oshgan. 2021-yilning yarmida 20,2 mln dollarlik 15,3 ming tonna choy olib kelingan edi.
2022-yilning olti oyida O‘zbekiston choy mahsulotini eng ko‘p import qilgan davlat Xitoy bo‘lib turibdi — 13,2 ming tonna. Xitoydan Choy importi o‘tgan yilning mos davriga qaraganda 1,1 ming tonnaga ko‘paydi.
Keniya esa bu ko‘rsatkich bo‘yicha ikkinchi o‘rinni egalladi. Ushbu mamlakatdan 940 tonna choy olib kelingan (o‘tgan yilga qaraganda 160 tonnaga kam).
Uchinchi o‘rinni o‘tgan yillardagi kabi Eron egalladi — 431 tonna. Erondan choy importi 142,3 tonnaga kamaygan.
Bundan tashqari olti oy ichida Indoneziya, Vyetnam, Hindiston, Shri-lanka va Rossiya kabi davlatlardan ham choy importi 2021-yilga qaraganda qisqargan.
Izoh (0)