Буюк Британиядаги қандолат фабрикалари, новвойхоналар маҳсулотлар нархи ва энергия тўловларининг кескин ошиб кетаётгани туфайли бир қатор муаммоларга дуч келмоқда. Бу ҳақда Bloomberg хабар берди.
Мамлакатда бу йил инфляция 13 фоиздан ошиб кетиши кутилмоқда. Ҳозирда Буюк Британиядаги уй хўжаликларининг учдан бир қисми даромадининг 10 фоиздан кўпроғини энергияга сарфлашга мажбур.
Шундай вазиятда нархларнинг янада ўсиши аҳоли орасида озиқ-овқат қашшоқлигини оширмоқда.
Жорий йил бошида Украинадаги уруш туфайли дунёда асосий маҳсулотлар, жумладан, буғдой ва ўсимлик мойларининг жаҳон нархлари рекорд даражага етди. Гарчи июль ойида нархлар бироз пастлаган бўлса-да, бу вазият ўнгланишидан дарак эмас.
Бунинг сабаби, Европадаги озиқ-овқат ишлаб чиқарувчилари ҳозирда юқори энергия нархлари, газ, кўмир ва электр учун тўловлар одатдагидан бир неча баравар кўп бўлиши билан курашмоқда. Олдиндаги совуқ қиш кунлари эса хавотирларни оширмоқда.
Fediol саноат гуруҳи маълумотларига кўра, Буюк Британия ва Европа Иттифоқида ёғли ўсимликларни қайта ишлаш июнь ойида 3,2 фоизга тушиб, 2019 йилдан бери энг паст даражага етган.
Агар табиий газ тақчиллиги кучайиб борса, Европадаги энергия кўп талаб қиладиган озиқ-овқат заводлар фаолиятини тўхтатишга мажбур бўлиши мумкин.
Германия аллақачон уч босқичли фавқулодда вазият режасининг иккинчисини қабул қилган. Кейинги босқич эса саноатнинг тўхтаб қолишига олиб келиши мумкин.
Аввалроқ Европа ва Осиё газ учун курашни кучайтираётгани ҳақида хабар берилганди.
Изоҳ (0)