Germaniyaning Rostok shahriga birinchi marta AQSH oltingugurtli neft yetkazib berilgan. Bu haqda Reuters xabar bermoqda.
Ushbu neft tarkibida oltingugurt miqdori yuqori (0,5 foizdan oshiq) bo‘ladi.
Neftni qayta ishlash zavodlari 2023-yilda importi taqiqlanadigan Rossiya neftiga muqobil topishga urinishlari fonida AQSHdan oltingugurtli xomashyo Germaniyaga jo‘natildi.
Refinitiv kema kuzatuv xizmati ma’lumotlariga ko‘ra, Capricorn Sun tankeri 3-avgust kuni AQSHning Luiziana shtati qirg‘oqlari yaqinida neft ortib, Rostokga tushirgan.
Kema Shell tomonidan ijaraga olingan. Reuters ma’lumotlariga ko‘ra, u taxminan 570 ming barrel xomashyo tashishi mumkin.
Yevropa Ittifoqi iyun oyida bir qator istisnolardan tashqari, Rossiyaning tankerlar orqali neft yetkazib berishiga embargo joriy qilgan. U 2022-yil oxirida to‘liq ishga tushadi.
Qayta ishlash korxonalari Rossiya neftini Norvegiya, Saudiya Arabistoni, Britaniya va AQSH xomashyosi bilan almashtirishni rejalashtirmoqda.
2021-yilda AQSH kuniga qariyb 3 mln barrel neft eksport qildi, ammo Germaniya juda kichik xaridor bo‘lib, kuniga taxminan 77 ming barrelni import qiladi.
Izoh (0)