O‘zbekistonda nikohlanuvchi shaxslar majburiy tibbiy ko‘rikdan o‘tganlaridan so‘ng nikohni rasmiylashtirish tartibini belgilash ko‘zda tutilmoqda

2-avgust kuni Oliy Majlis Senatining Xotin-qizlar va gender tenglik masalalari qo‘mitasining majlisi bo‘lib o‘tdi. Bu haqda yuqori palata axborot xizmati xabar qildi.

Qayd etilishicha, unda senatorlar, qo‘mita huzuridagi ekspert guruhi a’zolari, xalq deputatlari mahalliy Kengashlarning Yoshlar siyosati, xotin-qizlar va gender tenglik masalalari bo‘yicha doimiy komissiyalari raislari, ekspertlar, vazirlik va idoralar mas’ullari hamda ommaviy axborot vositalari vakillari ishtirok etgan.

Majlisda Senatning navbatdagi yalpi majlisida muhokama qilinishi nazarda tutilgan masalalar dastlabki tarzda ko‘rib chiqilgan. “O‘zbekiston Respublikasining Oila kodeksiga o‘zgartish va qo‘shimchalar kiritish to‘g‘risida”gi qonun shular jumlasidan.

Ushbu qonunga ko‘ra, nikohni qayd etishning bir oylik muddati va uni qisqartirish uchun asos bo‘luvchi holatlar bekor qilinmoqda. Nikohlanuvchi shaxslar majburiy tibbiy ko‘rikdan o‘tganlaridan so‘ng nikohni rasmiylashtirish tartibini belgilash ko‘zda tutilmoqda.

Majlisda ko‘rilgan masalalar bo‘yicha qo‘mitaning tegishli qarorlari qabul qilingan.