O‘zbekistonda har yili 500 nafargacha 14–30 yoshdagi nogironligi bo‘lgan yoshlarga BHMning 50 baravarigacha subsidiya ajratiladi

Har yili 500 nafargacha 14–30 yoshdagi nogironligi bo‘lgan yoshlarga BHMning 50 baravarigacha (ya’ni 15 million so‘mgacha) subsidiya ajratiladi. Bu haqda AOKAda o‘tkazilgan brifingda Yoshlar ishlari agentligi axborot xizmati rahbari Nodir Abduqodirov ma’lum qildi.

2021-yil 21-dekabr kuni O‘zbekiston Respublikasi prezidenti tomonidan nogironligi bo‘lgan shaxslarni har tomonlama qo‘llab-quvvatlash, ularning bandligiga ko‘maklashish hamda ijtimoiy faolligini yanada oshirishga qaratilgan qaror qabul qilingan bo‘lib, mazkur qarorning 5-bandida Yoshlar ishlari agentligining Yoshlarga oid davlat siyosatini qo‘llab-quvvatlash jamg‘armasi mablag‘lari hisobidan har yili 500 nafargacha nogironligi bo‘lgan yoshlarni ijtimoiy qo‘llab-quvvatlash maqsadida subsidiya ajratib borish tizimini joriy etish vazifasi belgilangan edi.

Ushbu tizimni joriy etish maqsadida Vazirlar Mahkamasining qarori tasdiqlandi.

2022-yil 1-avgustdan boshlab O‘zbekiston Respublikasi Yoshlar ishlari agentligining Yoshlarga oid davlat siyosatini qo‘llab-quvvatlash jamg‘armasi mablag‘lari hisobidan har yili 500 nafargacha 14–30 yoshdagi nogironligi bo‘lgan yoshlarga bazaviy hisoblash miqdorining 50 baravarigacha (ya’ni 15 milliongacha) bo‘lgan miqdorda subsidiya ajratish tizimi yo‘lga qo‘yiladi.

Subsidiya 2 ta yo‘nalishda ajratiladi:

• Nogironligi bo‘lgan yoshlarga o‘qish, yashash va transport xarajatlarini qoplash uchun;
• Nogironligi bo‘lgan yoshlarga asbob-uskunalar va mehnat qurollarini xarid qilish uchun.

Ariza beruvchi — qarorga muvofiq subsidiya ajratishni so‘rab murojaat qilgan o‘n to‘rt yoshga to‘lgan va o‘ttiz yoshdan oshmagan nogironligi bo‘lgan O‘zbekiston Respublikasi fuqarosi, O‘zbekiston Respublikasi hududida yashash guvohnomasiga ega bo‘lgan chet el fuqarosi yoki fuqaroligi bo‘lmagan shaxs (o‘n olti yoshga to‘lmagan shaxs nomidan murojaat qilgan uning qonuniy vakili) tomonidan nodavlat ta’lim tashkilotida o‘qish yoki asbob-uskuna xarid qilish uchun subsidiya ajratishni so‘rab davlat xizmatlari markaziga murojaat qiladi yoki Yagona interaktiv davlat xizmatlari portali orqali Yoshlar ishlari agentligiga bevosita ariza yuboradi.

Arizalarni qabul qilish xizmati davlat xizmatlari markazi tomonidan bepul amalga oshiriladi.