O‘zbekiston, Ozarbayjon va Turkiya o‘rtasida barcha kelishuvlarni o‘z ichiga olgan Toshkent deklaratsiyasi imzolandi

O‘zbekiston, Ozarbayjon va Turkiya tashqi ishlar, savdo, iqtisodiyot va transport vazirlarining birinchi uch tomonlama uchrashuvi bo‘lib o‘tdi. Uch davlat prezidentlarining kelishuvlariga muvofiq tashkil etilgan ushbu mutlaqo yangi muloqot mexanizmi ko‘plab ustuvor masalalar bo‘yicha manfaatlar kesishadigan nuqtalarni topishga imkon berdi, deb xabar qildi Investitsiyalar va tashqi savdo vazirligi.

Qayd etilishicha, uchrashuv davomida tashqi siyosat masalalari va mintaqaviy hamkorlik imkoniyatlari, iqtisodiyot, savdo, investitsiyalar va transport sohalarida uchala mamlakat birlashgan salohiyatini to‘liq ro‘yobga chiqarishga qaratilgan sa’y-harakatlar yuzasidan fikr almashilgan.

So‘nggi besh yil ichida O‘zbekistonning Ozarbayjon va Turkiya bilan savdo aylanmasi ikki baravarga oshgani, 2021-yil oxiriga kelib bu ko‘rsatkich 3,5 milliard dollarga yetgani aytilgan. O‘zbekiston Respublikasi investitsiyalar va tashqi savdo vazirining birinchi o‘rinbosari Aziz Qudratov mamlakatlar o‘rtasidagi tovar ayirboshlash hajmini ikki baravar oshirish uchun barcha zarur shart-sharoitlar mavjudligini ta’kidlagan. O‘zbekiston Ozarbayjon va Turkiyaga texnika, o‘zbek to‘qimachiligi mahsulotlari, poyabzal va oziq-ovqat yetkazib berish hajmini oshirish imkoniyatiga ega.

Bozorlarga o‘zaro kirishni osonlashtirish uchun yangi elektron tijorat platformasini yaratish taklif qilingan. Bu tadbirkorlar, eksportchilar, importchilar o‘rtasida muloqotni osonlashtirib, tovarlarni arzon narxlarda sotish imkonini beradi.

Shuningdek, ishlab chiqarish kooperatsiyasini rivojlantirish, energetika sohasida hamkorlik qilish va uch mamlakatning yuqori tranzit salohiyatidan foydalanish bo‘yicha qo‘shma loyihalarni amalga oshirish imkoniyatlari ko‘rib chiqilgan. Shuningdek, hududlararo hamkorlikni chuqurlashtirish ustuvor vazifa sifatida belgilangan va shu munosabat bilan har yili O‘zbekiston–Ozarbayjon–Turkiya hududlararo forumini tashkil qilish va uning Toshkentda birinchi yig‘ilishini o‘tkazish taklif qilingan.

Uchrashuv yakunida forum maydonlaridagi barcha kelishuvlarni o‘z ichiga olgan Toshkent deklaratsiyasi imzolangan. Erishilgan barcha kelishuvlar ko‘plab mintaqaviy va xalqaro masalalar bo‘yicha o‘zaro hamkorlikni mustahkamlashga qaratilgan.