Tashqi ishlar vaziri vazifasini bajaruvchi Vladimir Norov 29-iyul kuni Shanxay hamkorlik tashkilotiga a’zo davlatlar Tashqi ishlar vazirlari kengashi (TIVK) yig‘ilishida ishtirok etish uchun O‘zbekistonga kelgan Pokiston Islom Respublikasi tashqi ishlar vaziri Bilaval Bhutto Zardariy bilan uchrashuv o‘tkazdi. Bu haqda TIV axborot xizmati xabar qildi.
Qayd etilishicha, Zardariy Toshkent shahrida bo‘lib o‘tgan yig‘ilish muvaffaqiyatli va yuqori tashkiliy darajada o‘tgani, bu yil tashkilot faoliyatidagi asosiy voqea – Samarqand shahrida o‘tkaziladigan sammitga tayyorgarlik ko‘rishning yakuniy bosqichi bo‘lganini ta’kidlagan. Pokiston tomoni O‘zbekistonning tashkilotga raisligi doirasida ilgari surilgan tashabbus va takliflarning to‘liq qo‘llab-quvvatlashini ma’lum qilgan.
O‘zbekiston—Pokiston munosabatlarini rivojlantirishning hozirgi holati va istiqbollari ko‘rib chiqilgan. Siyosiy muloqotni faollashtirish, savdo-iqtisodiy hamkorlikni kuchaytirish va madaniy-gumanitar almashinuvlarni kengaytirish bo‘yicha qo‘shma chora-tadbirlar ko‘rish to‘g‘risida kelishuvga erishilgan.
Iqtisodiy diplomatiyani rivojlantirish maqsadida savdo va bojxona tartib-qoidalarini o‘zaro asosda osonlashtirish, ikki mamlakat o‘rtasida havo qatnovini tiklash, iqtisodiyotning turli tarmoqlarida investitsiya loyihalarini amalga oshirish muhimligi qayd etilgan.
Madaniyat, ta’lim va turizm sohasidagi aloqalarni faollashtirish bo‘yicha takliflar ko‘rib chiqilgan.
Ayrim xalqaro va mintaqaviy masalalar, jumladan, Afg‘onistondagi vaziyat muhokama qilingan. Pokiston TIV rahbari konstruktiv xalqaro muloqot uchun zamin yaratgan Afg‘oniston bo‘yicha konferensiyaning samarali natijalarini qayd etgan.
Mavzuga doir:
- Vladimir Norov Qoraqalpog‘istondagi voqealar vaqtida turli xorijiy axborot resurslari feyk ma’lumotlar tarqatgani haqida gapirdi
- SHHTga a’zo davlatlar o‘zaro savdolarda dollardan voz kechish ustida ishlayotgani ma’lum qilindi
- Shavkat Mirziyoyev SHHTga a’zo davlatlar TIV delegatsiyalarining rahbarlarini qabul qildi
Izoh (0)