“Agrobank” mas’ullari “Daryo”da e’lon qilingan maqolaga bir-biriga zid ikki xil munosabat bildirdi.
Nashrda Qarshi shahrida yashovchi fuqaro Anvar Javharov kredit olish maqsadida bankka murojaat qilgani, bank mas’uli u bilan suhbatda kredit olish uchun tirikligini isbotlovchi hujjat so‘ragani xabar berilgandi. Mazkur holatga munosabat bildirgan “Agrobank” axborot xizmati dastlab holatni tasdiqlab, bank mas’uli fuqaro Anvar Javharov bankning kredit ma’lumotlar bazasida vafot etgan inson sifatida qayd etilgani uchun undan shu haqda hujjat so‘raganini yozib, qonunan bank xodimining ishi to‘g‘riligini ta’kidladi.
Ko‘p o‘tmay bank mas’ullari dastlabki axborotini tahrirlab, fuqarodan bunday mazmundagi hujjat talab qilinmaganini ma’lum qildi.
“Shuni ham alohida qayd etamizki, bank mas’ullari tomonidan fuqaro Anvar Javharovdan uning tirikligini tasdiqlovchi ma’lumot so‘ralmagan, aksincha 2021-yilda shaxs haqidagi elektron ma’lumotlar bazasida uning vafot etgani qayd etilgani uchun tegishli FHDY bo‘limidan buni inkor etuvchi ma’lumot olish mumkinligi tushuntirilgan”, — deyiladi “Agrobank”ning o‘zgartirilgan munosabatida.
Shuningdek, bank mas’ul xodimlar ushbu fuqaro bilan o‘zaro suhbat jarayonida uning 2022-yil davomida kredit olish bo‘yicha bankka murojaat qilmaganligi aniqlanganini qo‘shimcha qilgan.
Avvaliga axborot berib, dastlabki axborotini o‘zi inkor qilgan bank mas’ullari Ommaviy axborot vositalari xodimlaridan bankka tegishli ma’lumotlarni to‘liq o‘rganmasdan, asoslanmagan, tekshirilmagan materiallarni tarqatmaslikni so‘ragan.
“Bu holatlar qonunchilikda ko‘rsatilgan tegishli javobgarlikka olib kelishi mumkinligi haqida yana bir bor ogohlantiramiz”, — deyiladi bankning qayta tahrirlangan munosabatida.
“Daryo” tahririyati jamoatchilikka bankning dastlabki hamda o‘z axborotini inkor qilgan ikkinchi munosabatini ham taqdim qilib, mas’ullarga noto‘g‘ri axborot tarqatganlarga chora ko‘rilishi kerakligini eslatadi.
Izoh (0)