O‘zbekistonda aholining ichimlik suvi bilan ta’minlanganlik darajasi 71,2 foizga, oqova suv xizmati 17,5 foizga yetkazildi. Bu haqda AOKAda “O‘zsuta’minot” AJ raisi o‘rinbosari va mutasaddilari ishtirokida shu mavzuda o‘tkazilgan matbuot anjumanida ma’lum qilindi.
Qayd etilishicha, 2022-yilning I yarim yilligida respublika budjeti hisobidan (930,8 milliard so‘m) jami 1779,9 kilometr ichimlik va 74,8 kilometr oqova suv tarmoqlari, 121 ta inshootni qurish hamda rekonstruksiya qilish ishlari amalga oshirildi, 69 ta obyektda qurilish-montaj ishlari yakunlandi.
Xalqaro moliya institutlari mablag‘lari hisobidan (108,3 million dollar) jami 119,2 kilometr ichimlik va 33,9 kilometr oqova suv tarmoqlarini qurish hamda rekonstruksiya ishlari amalga oshirildi, 4 ta suv taqsimlash inshooti qurildi va 5 ta suv taqsimlash inshooti rekonstruksiya qilindi.
2022-yilda “O‘zsuvta’minot” AJ tomonidan xalqaro moliya institutlari ishtirokida 20 ta loyiha amalga oshirilmoqda. Ushbu loyihalar Jahon banki, Osiyo taraqqiyot banki, Yevropa tiklanish va taraqqiyot banki, Osiyo infratuzilmaviy investitsiyalar banki, Islom taraqqiyot banki hamda Saudiya taraqqiyot va OPEK jamg‘armalarining 1 milliard 861 million dollar qarz mablag‘lari hisobidan moliyalashtirilishi ko‘zda tutilgan.
Yil yakuniga qadar 2 trillion so‘mdan ortiq mablag‘lar doirasida 527 ta inshoot, 5,5 ming kilometr ichimlik hamda oqova suv tarmoqlarini qurish va rekonstruksiya qilish, shuningdek, xalqaro moliya institutlarining 245,1 million dollar miqdoridagi mablag‘lari hisobidan 1,6 million aholini ilk bor ichimlik suvi bilan ta’minlash, 3,4 million aholining ichimlik suvi ta’minotini yaxshilash va shu tariqa markazlashgan ichimlik suvi bilan ta’minlanganlik darajasini 74,2 foizga, oqova suv xizmatlari bilan qamrab olinganlik ko‘rsatkichini esa 18 foizga yetkazish rejalashtirilgan.
Izoh (0)