Ташқи ишлар вазири вазифасини бажарувчи Владимир Норов 29 июль куни Шанхай ҳамкорлик ташкилотига аъзо давлатлар Ташқи ишлар вазирлари кенгаши (ТИВК) йиғилишида иштирок этиш учун Ўзбекистонга келган Покистон Ислом Республикаси ташқи ишлар вазири Билавал Бҳутто Зардарий билан учрашув ўтказди. Бу ҳақда ТИВ ахборот хизмати хабар қилди.
Қайд этилишича, Зардарий Тошкент шаҳрида бўлиб ўтган йиғилиш муваффақиятли ва юқори ташкилий даражада ўтгани, бу йил ташкилот фаолиятидаги асосий воқеа – Самарқанд шаҳрида ўтказиладиган саммитга тайёргарлик кўришнинг якуний босқичи бўлганини таъкидлаган. Покистон томони Ўзбекистоннинг ташкилотга раислиги доирасида илгари сурилган ташаббус ва таклифларнинг тўлиқ қўллаб-қувватлашини маълум қилган.
Ўзбекистон—Покистон муносабатларини ривожлантиришнинг ҳозирги ҳолати ва истиқболлари кўриб чиқилган. Сиёсий мулоқотни фаоллаштириш, савдо-иқтисодий ҳамкорликни кучайтириш ва маданий-гуманитар алмашинувларни кенгайтириш бўйича қўшма чора-тадбирлар кўриш тўғрисида келишувга эришилган.
Иқтисодий дипломатияни ривожлантириш мақсадида савдо ва божхона тартиб-қоидаларини ўзаро асосда осонлаштириш, икки мамлакат ўртасида ҳаво қатновини тиклаш, иқтисодиётнинг турли тармоқларида инвестиция лойиҳаларини амалга ошириш муҳимлиги қайд этилган.
Маданият, таълим ва туризм соҳасидаги алоқаларни фаоллаштириш бўйича таклифлар кўриб чиқилган.
Айрим халқаро ва минтақавий масалалар, жумладан, Афғонистондаги вазият муҳокама қилинган. Покистон ТИВ раҳбари конструктив халқаро мулоқот учун замин яратган Афғонистон бўйича конференциянинг самарали натижаларини қайд этган.
Мавзуга доир:
- Владимир Норов Қорақалпоғистондаги воқеалар вақтида турли хорижий ахборот ресурслари фейк маълумотлар тарқатгани ҳақида гапирди
- ШҲТга аъзо давлатлар ўзаро савдоларда доллардан воз кечиш устида ишлаётгани маълум қилинди
- Шавкат Мирзиёев ШҲТга аъзо давлатлар ТИВ делегацияларининг раҳбарларини қабул қилди
Изоҳ (0)