Korrupsiyaga qarshi kurashish agentligi tomonidan Qashqadaryo viloyatida O‘zbekiston Respublikasi prezidentining 2021-yil 16-dekabrdagi “Tomorqadan foydalanish samaradorligini oshirish, shuningdek, aholining tadbirkorlik tashabbuslarini moliyaviy qo‘llab-quvvatlash bo‘yicha qo‘shimcha chora-tadbirlar to‘g‘risida”gi PQ-54-son qarori hamda “Har bir oila tadbirkor” dasturiga asosan kreditlarning ajratilishi ahvoli yuzasidan o‘rganish o‘tkazildi.
O‘rganish natijasida mazkur yo‘nalishdagi kreditlar maqsadsiz ishlatilayotgani, ta’minotchi korxonalar tomonidan ko‘zda tutilgan tovar va ashyolar fuqarolarga yetkazib berilmagani holatlari aniqlandi.
Jumladan, 3 ta tijorat banki (“Xalq banki”, “Agrobank”, “Mikrokreditbank”) mijozlariga 2022-yil 1 choragida ajratilgan kredit mablag‘lari hisobidan 15 ta ta’minotchiga 392 nafar mijoz bo‘yicha 11 milliard 548 million so‘m o‘tkazib bergani, ammo, ushbu kredit yo‘nalishi bo‘yicha yetkazib berilgan tovarlar bo‘yicha ta’minotchilarning kirim hujjatlari mavjud emasligi, ya’ni ajratilgan kreditlar maqsadsiz yo‘naltirilgani ma’lum bo‘ldi.
Misol uchun, AT “Mikrokreditbank” Beshkent filiali tomonidan fuqaro M.E.ga ajratilgan 33 million so‘m kredit mablag‘iga 60 dona quyon, fuqaro G‘.B.ga baliqchilik uchun ajratilgan 33 million so‘mlik kredit mablag‘iga baliq chovoqlari yetkazib berilmay, kredit mablag‘lari maqsadsiz ishlatilgan.
Shuningdek, “S.T.G.” MCHJga 3 ta bank orqali 48 nafar fuqaroga ajratilgan 1 milliard 412 million so‘m kredit mablag‘lari asalari, parranda, motokultivator, chorva qo‘yi, tikuv mashinasi, kompyuter sotib olish uchun o‘tkazib berilgan bo‘lsa-da, ushbu tovarlar sotib olinmasdan kredit mablag‘lari boshqa maqsadlar uchun yo‘naltirilgani aniqlandi.
Agentlik tomonidan tekshirishda to‘plangan hujjatlar qonuniy baho berish uchun Bosh prokuratura huzuridagi Iqtisodiy jinoyatlarga qarshi kurashish departamentiga yuborilgan bo‘lib, departamentning Qashqadaryo viloyati boshqarmasi tomonidan 5 ta ta’minotchining rahbarlari va boshqalarga nisbatan Jinoyat kodeksining 167, 184, 189, 209, 228-moddalarining tegishli bandlarida nazarda tutilgan qonunbuzilishlar yuzasidan jinoyat ishlari qo‘zg‘atildi.
Shuningdek, qolgan 10 ta ta’minotchi va boshqalarga nisbatan tayyorlangan materiallar yuzasidan bugungi kunda tergovga qadar tekshiruv harakatlari olib borilmoqda.
Izoh (0)