Коррупцияга қарши курашиш агентлиги томонидан Қашқадарё вилоятида Ўзбекистон Республикаси президентининг 2021 йил 16 декабрдаги «Томорқадан фойдаланиш самарадорлигини ошириш, шунингдек, аҳолининг тадбиркорлик ташаббусларини молиявий қўллаб-қувватлаш бўйича қўшимча чора-тадбирлар тўғрисида»ги ПҚ-54-сон қарори ҳамда «Ҳар бир оила тадбиркор» дастурига асосан кредитларнинг ажратилиши аҳволи юзасидан ўрганиш ўтказилди.
Ўрганиш натижасида мазкур йўналишдаги кредитлар мақсадсиз ишлатилаётгани, таъминотчи корхоналар томонидан кўзда тутилган товар ва ашёлар фуқароларга етказиб берилмагани ҳолатлари аниқланди.
Жумладан, 3 та тижорат банки («Халқ банки», «Агробанк», «Микрокредитбанк») мижозларига 2022 йил 1 чорагида ажратилган кредит маблағлари ҳисобидан 15 та таъминотчига 392 нафар мижоз бўйича 11 миллиард 548 миллион сўм ўтказиб бергани, аммо, ушбу кредит йўналиши бўйича етказиб берилган товарлар бўйича таъминотчиларнинг кирим ҳужжатлари мавжуд эмаслиги, яъни ажратилган кредитлар мақсадсиз йўналтирилгани маълум бўлди.
Мисол учун, АТ «Микрокредитбанк» Бешкент филиали томонидан фуқаро М.Э.га ажратилган 33 миллион сўм кредит маблағига 60 дона қуён, фуқаро Ғ.Б.га балиқчилик учун ажратилган 33 миллион сўмлик кредит маблағига балиқ човоқлари етказиб берилмай, кредит маблағлари мақсадсиз ишлатилган.
Шунингдек, «С.Т.Г.» МЧЖга 3 та банк орқали 48 нафар фуқарога ажратилган 1 миллиард 412 миллион сўм кредит маблағлари асалари, парранда, мотокултиватор, чорва қўйи, тикув машинаси, компьютер сотиб олиш учун ўтказиб берилган бўлса-да, ушбу товарлар сотиб олинмасдан кредит маблағлари бошқа мақсадлар учун йўналтирилгани аниқланди.
Агентлик томонидан текширишда тўпланган ҳужжатлар қонуний баҳо бериш учун Бош прокуратура ҳузуридаги Иқтисодий жиноятларга қарши курашиш департаментига юборилган бўлиб, департаментнинг Қашқадарё вилояти бошқармаси томонидан 5 та таъминотчининг раҳбарлари ва бошқаларга нисбатан Жиноят кодексининг 167, 184, 189, 209, 228-моддаларининг тегишли бандларида назарда тутилган қонунбузилишлар юзасидан жиноят ишлари қўзғатилди.
Шунингдек, қолган 10 та таъминотчи ва бошқаларга нисбатан тайёрланган материаллар юзасидан бугунги кунда терговга қадар текширув ҳаракатлари олиб борилмоқда.
Изоҳ (0)