Farg‘ona viloyatida faoliyat yurituvchi bloger Olimjon Haydarov 15 sutkaga qamalgani xabar berilgandi. Farg‘ona viloyati sudlarining ma’lumot berishicha, u ikki kundan so‘ng jazodan ozod qilingan.
Ma’lum qilinishicha, fuqaro K.Ahmedov 2022-yil 26-iyun kuni diniy adovatni targ‘ib qiluvchi material tayyorlab, Facebook ijtimoiy tarmog‘idagi sahifasida e’lon qilgan. Shuningdek, Olimjon Haydarov ham 2022-yil 26 iyun kuni K.Ahmedov tomonidan e’lon qilingan materialni Facebook’dagi sahifasiga joylashtirib, kengroq tarqalishiga ko‘maklashgan.
K.Ahmedov va O.Haydarovlarning bu xatti-harakatiga nisbatan Qo‘qon shahar IIB tomonidan tergovga qadar tekshiruv olib borilib, ularning har ikkisi Ma’muriy javobgarlik to‘g‘risidagi Kodeksning 184-3-moddasi (milliy, irqiy, etnik yoki diniy adovatni targ‘ib qiluvchi materiallarni tayyorlash, saqlash yoki tarqatish)da nazarda tutilgan huquqbuzarlikni sodir etgan, deb topilgan va qonuniy jazo tayinlash uchun sudga yuborilgan.
Jinoyat ishlari bo‘yicha Qo‘qon shahar sudining 2022-yil 22-iyuldagi qaroriga asosan K.Ahmedov va O.Haydarov Ma’muriy javobgarlik to‘g‘risidagi Kodeksning 184-3-moddasida nazarda tutilgan huquqbuzarlikni sodir etgan, deb topilib, ularning har ikkisiga nisbatan 15 (o‘n besh) sutkadan ma’muriy qamoq jazosi tayinlangan.
Sud qaroridan norozi bo‘lgan K.Ahmedov va O.Haydarovlar 2022-yil 24-iyul kuni Farg‘ona viloyat sudi jinoyat ishlari bo‘yicha sudlov hay’ati apellyatsiya instansiyasiga apellyatsiya shikoyati kiritgan.
Apellyatsiya instansiyasining qaroriga ko‘ra jinoyat ishlari bo‘yicha Qo‘qon shahar sudining 2022-yil 22-iyuldagi qarorining Olimjon Haydarovga oid qismi bekor qilinib, qo‘shimcha surishtiruv harakatlarini o‘tkazish uchun Qo‘qon shahar IIBga yuborilgan.
Bloger Olimjon Haydarov 2022-yil 24-iyul kuni soat 19:30 dan e’tiboran qamoqdan ozod qilinib, ikki sutka ma’muriy qamoqda saqlangan kuni uchun 90 ming so‘m qamoq xarajatlari undirilishi belgilangan. Qarorning qolgan qismi o‘zgarishsiz qoldirilgan.
Izoh (0)