Rossiyaga ishlash uchun borib, balandlikdan yiqilgan va og‘ir tan jarohati olgan O‘zbekiston fuqarosi vatanga qaytarildi. Bu haqda Tashqi mehnat migratsiyasi agentligi axborot xizmati xabar berdi.
Qayd etilishicha, farg‘onalik A.A. 2022-yilda vaqtinchalik mehnat faoliyatini amalga oshirish uchun Rossiyaga borgan, 16-iyul kuni baxtsiz hodisa oqibatida balandlikdan yiqilib, og‘ir tan jarohati olgan hamda jarrohlik amaliyotini boshidan kechirgan.
Bugungi kunda fuqaro mehnat qilish layoqatini yo‘qotgani va aviachipta sotib olish uchun yetarli mablag‘i yo‘qligini ma’lum qilgan holda Tashqi mehnat migratsiyasi agentligining Moskva shahridagi vakolatxonasiga murojaat qilib, O‘zbekistonga qaytishda yordam so‘ragan.
Xorijda qiyin ahvolda qolgan mehnat migrantlariga yordam ko‘rsatadigan Xorijda mehnat faoliyatini amalga oshiruvchi fuqarolarni qo‘llab-quvvatlash hamda ularning huquq va manfaatlarini himoya qilish jamg‘armasi tashkil etilgan bo‘lib, ana shu jamg‘arma hisobidan A.A.ga aviachipta olib berilib, ortga qaytarildi.
Izoh (0)