Sirdaryoda sport anjomlari xaridida 1,2 mlrd so‘mdan ortiq pul talon-toroj qilindi

Sirdaryo viloyatida sport anjomlari xarid qilishda 1,2 milliard so‘mdan ortiq budjet mablag‘lari talon-toroj qilindi. Bu haqda O‘zA xabar berdi.

Ma’lum qilinishicha, 2021-yilning dekabr oyida viloyat turizm va sport bosh boshqarmasi tomonidan 24 turdagi jami 2612 dona sport anjomini xarid qilish uchun 7 ta firma bilan umumiy qiymati 1 milliard 976 million 778 ming so‘mlik 31 ta shartnoma tuzilgan.

Lekin bosh boshqarma hamda firmalarning mansabdor shaxslari o‘zaro kelishgan holda sport anjomlarining sun’iy qimmatlashtirilgan oldi-sotdisini amalga oshirgan.

DXXning Sirdaryo viloyati bo‘yicha boshqarmasi tashabbusi bilan o‘tkazilgan sudga oid tovarshunoslik ekspertizasining xulosasiga ko‘ra, umumiy o‘rtacha bozor qiymati 720 million 361 ming so‘mni tashkil etgan sport anjomlari 1 milliard 976 million 778 ming so‘mga sotib olingan.

Eslatib o‘tamiz, avvalroq Suzish federatsiyasi mansabdorlari 1 milliard so‘mdan ortiq pulni talon-toroj qilgani aytilgandi.