Фарғона вилоятида фаолият юритувчи блогер Олимжон Ҳайдаров 15 суткага қамалгани хабар берилганди. Фарғона вилояти судларининг маълумот беришича, у икки кундан сўнг жазодан озод қилинган.
Маълум қилинишича, фуқаро К.Аҳмедов 2022 йил 26 июнь куни диний адоватни тарғиб қилувчи материал тайёрлаб, Facebook ижтимоий тармоғидаги саҳифасида эълон қилган. Шунингдек, Олимжон Ҳайдаров ҳам 2022 йил 26 июнь куни К.Аҳмедов томонидан эълон қилинган материални Facebook’даги саҳифасига жойлаштириб, кенгроқ тарқалишига кўмаклашган.
К.Аҳмедов ва О.Ҳайдаровларнинг бу хатти-ҳаракатига нисбатан Қўқон шаҳар ИИБ томонидан терговга қадар текширув олиб борилиб, уларнинг ҳар иккиси Маъмурий жавобгарлик тўғрисидаги Кодекснинг 184-3-моддаси (миллий, ирқий, этник ёки диний адоватни тарғиб қилувчи материалларни тайёрлаш, сақлаш ёки тарқатиш)да назарда тутилган ҳуқуқбузарликни содир этган, деб топилган ва қонуний жазо тайинлаш учун судга юборилган.
Жиноят ишлари бўйича Қўқон шаҳар судининг 2022 йил 22 июлдаги қарорига асосан К.Аҳмедов ва О.Ҳайдаров Маъмурий жавобгарлик тўғрисидаги Кодекснинг 184-3-моддасида назарда тутилган ҳуқуқбузарликни содир этган, деб топилиб, уларнинг ҳар иккисига нисбатан 15 (ўн беш) суткадан маъмурий қамоқ жазоси тайинланган.
Суд қароридан норози бўлган К.Аҳмедов ва О.Ҳайдаровлар 2022 йил 24 июль куни Фарғона вилоят суди жиноят ишлари бўйича судлов ҳайъати апелляция инстанциясига апелляция шикояти киритган.
Апелляция инстанциясининг қарорига кўра жиноят ишлари бўйича Қўқон шаҳар судининг 2022 йил 22 июлдаги қарорининг Олимжон Ҳайдаровга оид қисми бекор қилиниб, қўшимча суриштирув ҳаракатларини ўтказиш учун Қўқон шаҳар ИИБга юборилган.
Блогер Олимжон Ҳайдаров 2022 йил 24 июль куни соат 19:30 дан эътиборан қамоқдан озод қилиниб, икки сутка маъмурий қамоқда сақланган куни учун 90 минг сўм қамоқ харажатлари ундирилиши белгиланган. Қарорнинг қолган қисми ўзгаришсиз қолдирилган.
Изоҳ (0)