Qozog‘iston g‘arbidagi Tengiz neft va gaz konida yuz bergan portlashda ikki ishchi halok bo‘ldi. Bu haqda Atirau viloyati politsiya boshqarmasi matbuot xizmatiga tayanib, Tengrinews xabar berdi.
“Yana uch kishi jarohat oldi. Voqea yuzasidan jinoyat ishi qo‘zg‘atildi”, — deyiladi IIB matbuot xizmati xabarida.
Portlash mahalliy vaqt bilan 10:30 atrofida sodir bo‘lgan. Kondagi atmosfera gazi jamlangan quvurda gidrosinov o‘tkazilayotgan edi. Quvur bosimga dosh berolmay, portlab ketgan. Bu ma’lumotni “Tengizshevroyl” kompaniyasi tasdiqladi. U Amerikaning Chevron va ExxonMobil kompaniyalari, Qozog‘istonning “KazMunayGaz” va Rossiyaning “LUKOIL LUKArco” kompaniyalari sho‘ba korxonasi bo‘lib, konni qazish bilan shug‘ullanadi.
Tengiz koni 1979-yilda ochilgan. U Qozog‘istonning Atirau viloyatida, Atirau shahridan 350 kilometr janubi-sharqda joylashgan.
Izoh (0)