Pentagon AQSHni gipertovushli quroldan himoya qilish uchun raketa hujumiga qarshi mudofaa tizimini aerostatlar ko‘rinishidagi uchar qurilmalar bilan to‘ldirishni rejalashtirmoqda. Bu haqda Politico Amerika mudofaa idorasi hujjatlariga tayanib xabar berdi.
Aerostatlar — parvoz uchun qobiq ichiga to‘ldirilgan gazdan foydalanuvchi qurilmalar bo‘lib, ularga havo sharlari, dirijabllar, meteorologik zondlar misol bo‘la oladi.
“Yangi reja AQSHga raqobatchilari — Rossiya va Xitoyni ortda qoldirish imkonini beradi. 18 dan 27 kilometrgacha balandlikda harakatlanishga qodir bo‘lgan balandda uchadigan shishirilma uchar qurilmalar keng kuzatuv tarmog‘ining tarkibiy qismiga aylanishi va istiqbolda gipertovushli qurolni kuzatib aniqlashda qo‘llanilishi mumkin”, — deb yozadi gazeta.
Xuddi ilmiy fantastikadek bo‘lib ko‘rinadigan bunday rejalar haqiqat ekanini tasdiqlash uchun Politico Pentagon hujjatlaridagi ma’lumotlarni keltirib o‘tdi, ularga ko‘ra, 2023-yilda ushbu dastur doirasidagi ishlanmalarga 27,2 million dollar ajratiladi, so‘nggi ikki yil davomida esa bu maqsadlarga 3,8 million dollar yo‘naltirilgan.
Pentagon aerostatlar bilan qiziqib qolishiga ulardan turli maqsadlarda foydalanish mumkinligi sabab bo‘lgan: xususan, ular “Rossiya va Xitoy tomonidan ishlab chiqilayotgan gipertovushli qurolni qidirib topishi va tiyib turishi” mumkin, deb hisoblaydi Politico.
Gazeta eslatishicha, Pentagon bir necha yillar davomida quyosh energiyasida ishlaydigan balandga uchuvchi shishirilma uchar qurilmalarni ma’lumotlar to‘plash, quruqlikdagi kuchlarni aloqa va kommunikatsiyalar bilan ta’minlash sohasida, shuningdek, muammolar yuzaga kelgan taqdirda, sun’iy yo‘ldoshlarga tayanch bo‘lish uchun sinovdan o‘tkazgan.
Izoh (0)