Қозоғистон ғарбидаги Тенгиз нефть ва газ конида юз берган портлашда икки ишчи ҳалок бўлди. Бу ҳақда Атирау вилояти полиция бошқармаси матбуот хизматига таяниб, Tengrinews хабар берди.
«Яна уч киши жароҳат олди. Воқеа юзасидан жиноят иши қўзғатилди», — дейилади ИИБ матбуот хизмати хабарида.
Портлаш маҳаллий вақт билан 10:30 атрофида содир бўлган. Кондаги атмосфера гази жамланган қувурда гидросинов ўтказилаётган эди. Қувур босимга дош беролмай, портлаб кетган. Бу маълумотни «Тенгизшевройл» компанияси тасдиқлади. У Американинг Chevron ва ExxonMobil компаниялари, Қозоғистоннинг «КазМунайГаз» ва Россиянинг «LUKOIL LUKArco» компаниялари шўъба корхонаси бўлиб, конни қазиш билан шуғулланади.
Тенгиз кони 1979 йилда очилган. У Қозоғистоннинг Атирау вилоятида, Атирау шаҳридан 350 километр жануби-шарқда жойлашган.
Изоҳ (0)